3 days ago
PM Marape, Manele na sampla moa Pacific lida istap long Nice UN Ocean Conference
Displa hae levol United Nations Ocean Conference long Nice (Neez) long France igat gutpla stat taim President blong France, Emmanuel Macron itokaut taim em opim displa conference aste olsem, moa long 50 pla kantri i ratifaim or mekim offisol pinis displa High Seas Treaty.
Theme or het toktok blong displa namba 3 UN Ocean Conference em long "Accelerating action and mobilising all actors to conserve and sustainably use the ocean," blong dil wantaim crisis we i gohet long bagarapim Ocean we i kam long overfishing, Climate Change na pollution.
Displa bikpla UN Ocean Conference tupla France na Costa Rica nau i bung long hostim long Nice em bai gohet igo inap long Friday displa wik.
Solwara em impotan tumas long ol kantri insait long Pacific, em olsem na ol Gavman lida blong Papua New Guinea, Solomon Islands, Cook Islands, Federated States of Micronesia, French Polynesia, Niue, Palau, Marshall Islands, Samoa na Tuvalu - wantaim tu ol hae levol representative blong Fiji, Kiribati, Nauru, New Caledonia, Tonga na Vanuatu oli stap long displa UN Ocean Conference.
Wanpla bikpla agrimen we United Nations em i laik long sampla moa kantri i ratifaim nau em displa High Seas Treaty, we 126 kantri raun long world ol ibin wanbel longen long 2023, tasol em i nidim 60pla kantri long ol i ratifaim long UN iken enfosim.
Displa internasinol High Seas Treaty em blong lukautim environment long high seas - na em i karamapim sampla key eria insait long bikpla solwara inkludim ol plants na animal aninit long solwara.
