16 hours ago
陳康堤首支單曲doll搵Eason Chan幫手？留言反應正面讚有歐美歌手feel
陳奕迅同徐濠縈嘅女兒陳康堤Constance轉眼經已大個女，今年20歲嘅康堤簽約華納唱片，尋日推出首支英文單曲doll，由康堤同知名年輕音樂人 Ernest Choi 聯手創作，描繪出從有毒、具操控性的關係中掙脫歷程。從歌曲創作名單中，竟然見到Eason Chan有份編曲！原來係另一位年青音樂人陳易行(Eason），而唔係Daddy陳奕迅。但係媽咪徐濠縈就真係有出手，當然係負責形象指導。
唔少圈中人都打氣支持陳康堤，天后級嘅Sammi鄭秀文、容祖兒，同公司嘅師姐陳蕾、Moon Tang都喺IG留言，爸爸Eason直情係喺康堤IG第一個post就留言話Soooooo happy and sooooo pride of you, my dearest dorda. Have fun please~
講到尾做歌手都係音樂最緊要，新歌反應又如何呢？doll嘅MV上架半日暫時有4萬7千次點擊，尚算唔錯。而網民留言反應普遍正面，「估唔到把聲咁有Character 中低音好聽 唔係一般Cantopop主流曲風」、「Constance把聲係現時香港樂壇搵唔到嘅一種jazzy pop vibe」、「難怪佢爸爸會比佢出道、音色好有辨識度」、「一開始聽完全以為係邊個外國歌手新作」等。亦有人見到康堤出道覺得感慨。「睇完呢個 MV, 再望下 Eason 個隻碟既封面, 就知道自己真係老喇」，網民講緊Eason 2006年嘅Life Continues EP，當年只得2歲嘅「包包」（康堤乳名）就係唱片封面嘅小女孩，而家佢已經成為型格女歌手了～
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
