Latest news with #EconomicFinancialCrimesCommission
BBC News
08-04-2025
- BBC News
Man wey spray and abuse naira for im wedding chop prison sentence
One Federal High Court for Kano don sentence one makeup artist to six months in prison sake of naira abuse. Justice S.M Shuaibu jail Abdullahi Musa Huseini afta im plead guilty to one-count charge bordering on abuse and mutilation of di naira. For one statement by di Economic Financial Crimes Commission (EFCC), court find Huseini guilty say im mutilate money wey im spray during im wedding. Di charge read: "Dat you, Abdullahi Musa Huseini, on di 6th day of December, 2024, at Ali Jita Event Centre, Kano, within di jurisdiction of di Honourable Court whilst dancing during a social event tamper wit di sum N100,000.00 (One Hundred Thousand Naira) in 1000 notes denomination wey di Central Bank of Nigeria issue by spraying in di said occasion and you thereby commit offence contrary to and punishable under Section 21(1) of di Central Bank Act, 2007" "Di convict bin chop arrest afta credible intelligence on im involvement in di deliberate mutilation of di Nigerian currency as e spray am for im own wedding celebration. "Investigations reveal say Huseini willfully deface and abuse di naira notes in defiance of warning and campaigns against di practice by di EFCC," di anti-graft agency tok. Wen dem arraign am, Huseini bin plead guilty to di charge, and dis prompt di prosecution counsel, Zarami Mohammed, to present di facts of di case and tender evidence bifor di court. Delivering judgment, Justice Shuaibu found am guilty as charged and sentence am to six months imprisonment witout option of fine.
BBC News
28-03-2025
- Politics
- BBC News
Who be di industrialist Aisha Achimugu wey EFCC declare wanted
Di Economic Financial Crimes Commission (EFCC) don declare one popular socialite and managing director/CEO of Felak Concept Group, Aisha Achimugu wanted. For one circular on dia social media accounts on Friday, 28 March, di commission say Achimugu dey wanted for alleged criminal conspiracy and money laundering. According to di circular wey EFCC tok-tok pesin Dele Olawale sign, e say; "Di public dey hereby notified say Aisha Sulaiman Achimugu, wey im photograph appear above dey wanted by di Economic and Financial Crimes Commission (EFCC) for one alleged case of criminal conspiracy and money laundering." Di circular add say make anybody wey get useful information on di whereabouts of 51-year-old Madam Achimugu contact di commission for dia offices or go report for di nearest police station or oda security agencies. Atiku deny say e collect funds from Lagos state Di anti-graft agency announcement dey come afta di presidential candidate of di PDP Atiku Abubakar for di 2023 election reject one report say dem receive campaign funds for di election from di Lagos state govnor through Madam Aisha Achimugu. Di Abubakar Media Office for one statement on Thursday, 27 March tok say di former vice-president no ever meet Sanwo-Olu, talk less of collecting money from im hand. "We for Atiku Media Office don take note of reports for one section of di media say di govnor of Lagos State, Babajide Sanwo-Olu through Ms Aisha Achimugu bin give Atiku Abubakar, Vice President of Nigeria, 1999-2007 money wey allegedly belong to Lagos State. Di Economic and Financial Crimes Commission (EFCC) dey investigate di mata." Bifor di circular wey declare Madam Achimugu wanted, tori be say EFCC bin first don invite Madam Achimugu come dia office to provide clarification on one corruption case wey involve her wey dem dey investigate. "Di commission currently dey investigate one case and di need to obtain certain clarification from you don become important," In view of di above, you are kindly requested to attend one interview wit di undersigned through di Head of Investigation on Wednesday, 5th March 2025, by 10:00 hours prompt," di letter read. Who be Aisha Achimugu? Aisha Achimugu bin make media headlines for January 2024 wen she throw one lavish seven-day party to mark her 50th birthday anniversary. Di seven-day extravaganza wey quickly become di tok of town bin hold for Calivigny Island and Silversands for Grenada; also for Abuja, Nigeria capital. Plenty ogbonge Nigerians and politicians, including Lagos state Govnor Babajide Sanwo-Olu bin attend di celebration wey hold for di Caribbean Island of Grenada. For her website, Dr Aisha Achimugu describe herself as ogbonge businesswoman and industrialist, she be di Group Managing Director and Chief Executive Officer, FELAK CONCEPT GROUP; one technical and professional consortium wey consist of about eight active companies in various sectors and industries like Engineering, Maritime, Oil and Gas, ICT Learning and Development, and various other leading sectors. She also be di Chairman, Bluewave Exploration and Production Limited. According to her website, Madam Achimugu OFR don receive plenty recognition and awards for her business acumen and humanitarian services from several esteemed organisations, wey include, FORBES Best of Africa Innovative Leadership Awards- September 2022, Winner, Africa Best Quality Oil & Gas Exploration and Production Company of the year (Oceangate Engineering Oil & Gas Limited) 2023, National Honors Award- Officer of di Order of di Federal Republic 2023, Di Youth Ambassador for Peace Award, among many odas. Dem born Madam Achimugu for 22 January, 1974.
