a day ago
Resident tok how bandits kill plenti worshippers for Katsina mosque, beg govment for help
Bandits don attack mosque for Unguwan Mantau community, Malumfashi Local Govment Area for Katsina State, northern Nigeria, and kill plenti worshippers and injure odas.
According to one resident wey follow BBC News Pidgin tok, na 25 worshippers di bandits kill and na five pipo dem injure.
Di eyewitness wey no want make we mention im name say di attack happun around 6am for morning afta pipo finish dia Fijr prayer.
"Around 5:45am, di gunmen meet pipo for mosque afta dem finish Fijr prayer, dem just open fire on dem.
"Na immediately 25 pipo die, and more dan five odas injure, dem dey receive treatment for Katsina hospital now," e tok.
E add say wen di attack dey happun, dem no get any help from security pipo.
"Na afta di gunmen finish to kill pipo bifor security officers come. Dem snap picture and within two hours, dem don waka comot," e tok.
E add say since afta di attack, pipo dey live for fear, and some don run comot from di community to save dia lives.
"As I dey tok to you now, all my family no dey house again, dem don run comot for di community, pipo wey remain no plenti," e add.
Di resident beg di state govment and security pipo make dem help bring peace for dia community.
We dey update dis tori
