25-02-2025
Deadi body wit burn wounds for seaside bust NNPC claim say nobody die for Cawthorne Channel fire
Three deadibodi suspected to be di remains of victims of di fire explosion wey happen for Cawthorne Channel for don wash ashore.
Search and rescue teams discover di deadibodies wey get scars of fire burns on Monday, at about 2pm (1400 CET) on di shores of a fishing settlement behind Biekiri for di Cawthorne Channel.
Local media report say di location dey around Iloamatoru Community for Bonny local goment area of Rivers State, Southern Nigeria.
Dis dey contrary to claims by Nigerian National Petroleum Company Limited (NNPCL) say no casualties dey for di fire incident wey bin happen for dia facility for Cawthorne Channel 1.
Na one surveillance team for di area raise alert of di discovery of two bodies but on arrival, dem find only one as waves don carry di oda one.
Di search and rescue team carry di first body come go search for di second one, only to discover two oda bodies, making three altogeda.
Immediate past Chairman of Iloamatoru Community Surveillance Committee, Daniel Pollyn say e dey sad over di incident, come ask families of staff of NNPCL, OML 18 Energy, Sahara Group and Eroton Exploration & Production Company Limited wey dey work around Cawthorne Channel 1 to check with dia loved ones.
E say ,"We go take di corpses to di Police to do di needful but make families of NNPCL, OML 18, Sahara and Eroton wey get pipo wey dey work for dat area to check with dia loved ones.
Make dem also check wit di Police to identify di body if na dia relative.
Make dem no take dat NNPCL claim seriously, though we no go interfere wit am," e tok.
Pollyn come add say on dia part, all dia community members wey dey work dia dey accounted for but, " we no fit say di same for di company workers.
Make dia families ask di company kwesions if dia relatives never come home since dat Wednesday." E tok
Na on Wednesday, 19 February, 2025 fire incident happun for one facility for Cawthorne Channel 1 wey dey linked to OML 18 for Alakiri for Okrika local goment area wey dey jointly operated by NNPC Eighteen Operating Limited, NNPC Limited and OML 18 Energy Limited.
Chief Corporate Communications Officer of NNPCL, Olufemi Soneye, for statement tok say di fire break out for di dry crude storage barge BESTAF5 for Cawthorne Channel 1, Rivers State, and e spread to oda barges.
Soneye add say sake of di quick response of di company emergency teams and industry partners, dem successfully contain di fire come add say di incident no impact on flow station operations.
Soneye also say no casualties dey as a result of di incident and all personnel wey dey work on di said barges all dey safe, come add say NNPCL dey prioritize di safety of dia staff and stakeholders and dey fully committed to environmental protection and operational integrity.
"Most importantly, dia casualties no dey, and all personnel dey safe."
Dis claim by di company now get kwesion mark wit di discovery of dis three lifeless bodies wey get clear burn scars for dia bodies.
Di search and rescue teams handover all di three recovered deadibodies to di police authority for further investigation.
