From military ruler to democrat - ex-Nigeria President Buhari life in pictures

BBC News

7 hours ago

Muhammadu Buhari life track di dramatic changes for politics in Nigeria ova di last five decades – and often times im bin dey at di centre of events.
Di former Nigerian president, wey die on Sunday at di age of 82, become di kontri military leader afta one coup, di new junta send am go prison, and den decades later im reinvent imsef to win di presidency for democratic election.
For most of im pictures im bin dey wear dark glasses or thick, black-framed spectacles, im traditional zanna cap and e like to smile, much of Buhari life play out for public.
Buhari - picture hia na for 1977 wit di den-King of Sweden Carl XVI Gustaf and Saudi Arabia Sheikh Ahmed Zaki Yamani for 1977 - begin im military career straight out of school.
By di time dem take dis picture, Buhari don rise to become a regional military commander.
A few years later, for 1983, sojas overthrow elected President Shehu Shagari.
Although Buhari bin take di role of military ruler, im deny tori say im plot di coup, according to am senior commanders install am becos dem need figurehead. Oda accounts describe Buhari say im play a more active role for di takeover.
Afta two years of iron-hand rule, wit im crusade against corruption and various human rights abuses, dem remove Buhari. Di new junta bin place am under house arrest for three years.
For 2003, following decades away from politics, Buhari decide again to try again to lead di ckontri.
Dis time, im bid for di top job through a democratic election - e run for di All Nigerian Peoples Party (ANPP).
Hia see am for right, wit im running mate Chuba Okadigbo on di left and ANPP chairman Don Etiebet.
Olusegun Obasanjo beat Buhari for 2003, and im bin make two oda unsuccessful runs for di presidency for 2007 and 2011.
Despite dis failed bids, im accumulate supporters, including disaffected youngsters, wit im pledges to fight corruption and insecurity.
Buhari bin dey very popular for northern Nigeria, di region wia dem born am.
Hia, na one sign wey dem bin display for di city of Kaduna during di 2015 election, wey tell passers-by say pipo dia go only vote for "Baba" Buhari.
Buhari eventually win di election for 2015, e beat di incumbent President Goodluck Jonathan.
Im break record, as im become di first ever opposition candidate to win a general election.
Di historic moment wen Jonathan call Buhari to concede dey captured on camera.
But afta im finally enta office, Buhari first term bin no smooth. Di economy enter recession for di first time in a decade and security crises pile up.
Wen Buhari wife - her picture dey down - publicly criticise im administration, di president sparked outrage wen im say she belong to di kitchen.
Despite di challenges for im first term, Buhari win re-election for 2019.
As di president of one of Africa largest economies, im bin travel around di world, to attend high-profile summits and meet im fellow heads of state.
Queen Elizabeth bin greet Buhari for di Commonwealth leaders gathering for 2015.
Earlier for 2015, den-US President Barack Obama bin welcome am to to White House.
And for 2018, Buhari become di first leader from sub-Saharan Africa to meet President Donald Trump for Washington.
Following im death, for one clinic for London, Buhari dey remembered by some as a man wey break im campaign promises and crush dissent.
For odas, im be champion of order wey bin try im best wit di dysfunctional political system.
For one tribute to im old rival, Jonathan describe Buhari as someone wey "bin dey selfless for im commitment to im duty and serve di kontri wit character and a deep sense of patriotism".