Oil tanker and cargo vessel collide for North sea

BBC News

10-03-2025

One oil tanker and cargo vessel don jam for di North Sea as lifeboats and firefighting teams dey on di scene.
Reports say di ships collide off di coast of East Yorkshire and coastguard rescue operation dey currently go on.
Dem immediately call for a coastguard rescue helicopter from Humberside wit lifeboats from Skegness, Bridlington, Mablethorpe and Cleethorpes.
Two separate sources wey sabi about di crash tell di BBC say di oil tanker wey dey involve for di collision dey on fire.
Dem don send vessels wey get di power to fight firefighting to di scene of di incident.
Reports say dem don bring about 32 pipo come shore but dem neva know dia condition.
According to di chief executive of di Port of Grimsby East, some crew members neva dey accounted for.
Which tanker dey involved?
BBC business reporter Jonathan Josephs report say di oil tanker wey dey involved infor di collision na MV Stena Immaculate wey dey go from Agio Theodoroi for Greece to Killingholme for di UK.
Di ship dey managed by US logistics firm Crowley and na Sweden Stena Sphere wey dey controlled by di billionaire Olsson family get am.
Howeva, dis na one of just ten oil tankers wey dey listed for US government programme wey dey designed to supply di armed forces wit fuel during times of armed conflict or national emergency.
E mean say di US military fit call on di tanker in short notice but e no clear weda dem dey use am for dis purpose wen dis accident happun.
Di Lifeboat Institution add say reports from both vessels show say dem dey on fire as search and rescue teams from across di region don dey respond to di incident.
Statement from HM Coastguard say dem dey coordinate emergency response for di tanker and cargo vessel wey collide afta dem raise alarm for early morning.
"We call coastguard rescue helicopter from Humberside, togeda wit lifeboats from Skegness, Bridlington, Maplethorpe [sic] and Cleethorpes, HM Coastguard fixed-wing aircraft, and nearby vessels wey get firefighting capability.
Wetin trackers tell us?
Details about how di collision take happun still dey unclear, but with online tracking tools, BBC Joshua Cheetham still build a picture of wetin happun bifor di collision.
According to ship tracking site MarineTraffic, di Stena Immaculate bin travel from di Greek port of Agioi Theodoroi, and bin dey anchored outside Hull.
Di Solong bin sail from di Scottish port of Grangemouth to Rotterdam for Netherlands.
E show say di collision fit don happun for around 9:48 GMT.