أحدث الأخبار مع #أسامةعثمان
24 القاهرة
منذ 9 ساعات
- 24 القاهرة
تسجيل صوتي يتسبب في إقالة مدير مدرسة لغات بسوهاج.. المدير: مفبرك وهقاضي اللي نشره
شهدت محافظة سوهاج ، حالة من الجدل على فيسبوك، بعد انتشار مقطع صوتي تم تسجيله على الواتس، نُسب إلى مدير مدرسة الكوثر الرسمية للغات بسوهاج، يطالب معلمين بالمدرسة التشديد في الامتحانات على الطلاب، لكن في التصحيح يجب إنجاح الطلاب بدرجات عالية من أجل الشكل العام للمدرسة. تسجيل صوتي يتسبب في إقالة مدير مدرسة الكوثر الرسمية للغات بسوهاج وكان نص التسجيل الصوتي: "الإخوة المعلمين والمعلمات، بالنسبة للتصحيح زي ما إحنا عارفين، لو الدرجة مثلًا من 30، أقل درجة عايز أشوفها 25 من 30، ولو فيه ألوان، عايز اللون الأزرق بس معايا، هو السائد في المدرسة كلها، إحنا بنشد طول السنة ونعمل جروبات، وهعيد ليكم الكلام تاني عشان أفهمه ليكم. وتابع: بنذاكر للعيال ونفسّحهم ونشد على العيال، ونِيجي في لجان الامتحانات نشد عليهم، ونشد عليهم قوي كمان، وما نخليش عيل يحاول يغش ولا يبص قدامه ولا غيره، عشان يبقى عارف إن العيل اللي هينجح، هينجح بمجهوده مثلًا، أما التصحيح ده بتاعنا إحنا، ده سمعتنا إحنا ومدرستنا، والمدرسة ناجحة، والمدرسة متفوقة وعيالها شُطّار، ومدرّسيها كويسين وممتازين ومحدّش يهرب منها. وقال: لكن لو العيال فاشلة ودرجاتهم فاشلة، زي ما هم فاشلين، إنتوا عاملينهم فاشلين، يبقى العيال كلهم هيهربوا من المدرسة، والناس تقول: "ولدي مش نافع في اللغات"، وكلّه يحوّل، ونلاقي المدرسة فضيت، ومعاليكم برضه هيبقى نفس الكلام عليكم، فرجاء، مش هتكلم في موضوع التصحيح تاني، اللي شايفة نفسها مقصودة بالقصة دي، ومش عارفة تمسك القلم الأزرق، بعد إذنك اطلعي قولي: "أنا مش هصحح"، وأنا هعرف أشغّلك شغلانة تانية. افتكرت الصبغة عصير.. مصرع ربة منزل تناولت مادة سامة عن طريق الخطأ في سوهاج محافظ سوهاج لـ القاهرة 24: الفساد والمشروعات المتوقفة وقلة الموار المالية أبرز التحديات التي نواجهها وفي تصريح خاص من أسامة عثمان مدير مدرسة الكوثر الرسمية للغات بسوهاج لـ القاهرة 24، أكد أن التسجيل الصوتي المُنتشر والمُذاع على شبكات التواصل الاجتماعي وخاصة فيسبوك مفبرك ولا يخصه وسيقاضي من نشره ونسبه إليه. وأضاف أنه يعلم علم اليقين أن من نسب ذلك إليه ونشر الأمر على السوشيال ميديا، هي إحدى المدرسات التي تم توقيع جزاء 6 أيام عليها بسبب الغياب، بالإضافة إلى خصم من الراتب، مما جعلها تكيد له وتتسبب في إثارة البلبلة داخل المدرسة. وأكد أنه يعمل بالمدرسة منذ قرابة 5 سنوات، وأنه تسلمها – على حد قوله – وهي على الطوب الأحمر، وقد كافح وتحمل من أجل نجاحها وتميّزها، وكانت هناك في الآونة الأخيرة مسابقات عديدة لطلاب المدرسة في حفظ القرآن الكريم، والعديد من الأنشطة المتميزة للطلاب والمعلمين. وجدير بالذكر أن مدرسة الكوثر الرسمية للغات بحي الكوثر، تم إنشاؤها بتكلفة إجمالية بلغت 11 مليونًا و442 ألفًا و197 جنيهًا، وتضم المدرسة 33 فصلًا، منها 6 فصول لرياض الأطفال، بالإضافة إلى دورات مياه، ومعامل كمبيوتر ولغات، وغرف إدارية. وأشار إلى أن المدرسة مقامة على مساحة 4233 مترًا مربعًا، وتتكون من دور أرضي و4 أدوار علوية، كما تضم المدرسة 35 دورة مياه، منها دورة مياه مخصصة لذوي الإعاقة. إقالة مدير مدرسة الكوثر الرسمية للغات بسوهاج سبق أن قرر الدكتور محمد السيد، وكيل وزارة التربية والتعليم بسوهاج، إلغاء تكليف مدير مدرسة الكوثر الرسمية للغات وعودته إلى المديرية، وإحالته للتحقيق. جاء ذلك بناءً على تقرير لجنة المتابعة التي شكّلها وكيل الوزارة للتحقق مما تم تداوله على صفحات السوشيال ميديا بشأن أعمال التصحيح داخل المدرسة. وأكد وكيل الوزارة أنه لا يوجد أي مسؤول بقطاع التعليم في سوهاج فوق القانون، وأن أي شخص يتجاوز في عمله أو يتقاعس عن أداء مسئولياته سيتم محاسبته بحسم. وأضاف أن مديرية التربية والتعليم بسوهاج تحركت فورًا بمجرد رصد ما تم تداوله عن محاولة مدير المدرسة التأثير على أعمال التصحيح لأوراق إجابات الطلاب، وعلى الفور تم تشكيل لجنة من المتابعة لفحص الواقعة، وتم اتخاذ الإجراءات القانونية اللازمة لضمان إجراء التصحيح بنزاهة وشفافية، حتى يحصل كل طالب على حقه.
24 القاهرة
٢٨-٠٣-٢٠٢٥
- ترفيه
- 24 القاهرة
"لسه الدنيا بخير"
• من سنتين بالظبط كان الأستاذ "أسامة عثمان" مدرس اللغة الإنجليزية مراقب دور في واحدة من لجان امتحانات ثانوية عامة في واحدة من قرى محافظة الجيزة.. راجل محترم وفي حاله ومتميز في شغله وثقة الطلبة وباقي زمايله فيه كبيرة.. أثناء واحد من الامتحانات وتحديدًا في لحظة توزيع أوراق امتحان الجيولوجيا لاحظ إن فيه طالبة مكانها فاضي!.. سأل زميلاتها هي تعبانة؟.. البنات ردوا إن لأ يا أستاذ دي حتى كانت لحد الفجر بتتواصل معانا عادي!.. الله!.. أومال ماجتش ليه!، أكيد فيه حاجة.. الفكرة إن البنت من الشاطرين وأكيد غيابها ده له سبب قهري!.. فكر إنه يطلب رقم تليفونها من حد من البنات بس للأسف محدش كان جايب معاه موبايله عشان ممنوع.. والحل؟.. في ثواني فكر وقرر ينفذ.. سأل حد على عنوان بيتها، وخرج من المدرسة جرى ووقف توك توك وطلع على عنوان البنت.. كانت الساعة 9 وربع، والميزة إن البيوت في القرية قريبة من بعض فوصل بسرعة وبمجرد ما بقى قدام باب البيت بدأ يخبط بشكل متتالي ومزعج شوية!.. المفاجأة إن كل أفراد البيت بالبنت بأسرتها راحت عليهم نومة وصحيوا مخضوضين بسبب الخبط بتاعه!.. أول ما شاف البنت وعرف إن هي قال لها بإبتسامة بشوشة ماتقلقيش أنا مراقب اللجنة ويالا بسرعة إلبسي إسدال أو أى حاجة بسرعة ولسه فيه وقت.. البنت لبست في ثواني وأخدت أدواتها وركبوا التوك توك ووصلوا اللجنة الساعة كام؟.. 9 ونص!.. يعني كل ده حصل في ربع ساعة بس!.. وهو مين فينا قبل كده محصلش إن هو وأهل بيته كلهم ماراحتش علينا نومة؟.. معظمنا طبعًا.. البنت لحقت الامتحان بسبب الراجل ده اللي ربنا جعله سبب إن مستقبلها مايضيعش خصوصًا إن البنت فعلًا شاطرة!.. في لحظة من اللحظات ممكن مستقبل شخص يتوقف على قرار منك.. مجرد قرار. • من 5 سنين وقبل زيادة الأسعار المهولة اللي حصلت في أسعار العربيات أهالينا الصعايدة فى قرية "الدبابية" التابعة لمركز "إسنا" في محافظة الأقصر عملوا تصرف إنساني وحركة فى قمة النبل.. لما الأهالي لاحظوا إن القرية فيها حوالي 30 مريض بالفشل الكلوي، وكلهم بيحتاجوا يروحوا يعملوا غسيل كلى فى مستشفي إسنا العام اللي بتبعد عن القرية حوالى 25 كيلو، وكتير من المرضى بتكون مواعيد جلساتهم في وقت متأخر بالليل، ومابيكونش فيه مواصلات ده غير إن المشوار هيكلف المريض لو هياخد عربية مخصوص حوالي 200 جنيه قرروا يلموا من بعض ويشتروا ميكروباص يبقى مخصص لنقل الناس للمستشفى مجانًا!.. جمعوا 60 ألف جنيه وإشتروا عربية مستعمله، وبدأوا فعلًا في نقل الناس كل يوم بس مع الوقت وعشان العربية نص عُمر زي ما بيقولوا كانت أعطالها كتير فقرروا يجمعوا من بعض تاني، وإشتروا ميكروباص جديد تمامًا!.. إجمالي المبلغ اللي تم تجميعه 150 ألف جنيه، والميكروباص جديد ثمنه أساسًا 220 ألف جنيه.. بس صاحب المعرض واللي مش أقل جدعنة منهم لما عرف الغرض اللي بيتم شراء الميكروباص عشانه قرر يقسط لهم الباقي بدون فوايد!.. واحد من الأهالي اللي شاركوا فى الموضوع بيقول فى حوار صحفي: (أهالينا لما بيروحوا مواصلات بيتعبوا وكمان ساعات مبيلاقوش بالليل وكمان بيحتاجوا حد جمبهم يراعيهم، والمسافة بين القرية والمستشفى 25 كيلو متر، وعندنا عم محمود هو اللي بيسوق العربية، والعربية ممكن تروح للمستشفي كل يوم 3 مرات رايح جاى بس مش مهم عشان محدش يتبهدل).. الصعايدة جدعان.. زيهم زي كل أهل مصر لما بيلاقوا حد وضعه صعب، ومهما كانت ظروفهم هما كمان لكن بيمدوا إيديهم يسندوه ويشدوه باللي يقدروا عليه. • السنة اللي فاتت فيه عدد من قرايبي كانوا راجعين بعد الفجر من أحد الأفراح اللي كانوا حاضرينها في أسوان.. اللي يعرف الأفراح النوبية عندنا هيكون عارف إنها بتبتدي في وقت متأخر وبتخلص قُرب الفجر بشوية.. وهما راجعين اتعرض الأتوبيس اللي كانوا راجعين فيه لحادثة بعد اصطدامه بعربية نقل كبيرة.. النتيجة للأسف إن فيه 8 اتوفوا والباقيين اتنقلوا للمستشفى في أوضاع حرجة مختلفة.. معظم الحالات كانت محتاجة نقل دم.. كتبت عندي على حسابي على فيسبوك الخبر وطلبت من أى حد عنده القدرة على التبرع بالدم يتوجه لمستشفى كذا ومستشفى كذا ومستشفى كذا لإن من ضخامة العدد تم توزيع المصابين على 3 مستشفيات.. من ضمن الناس اللي راحت فوجئ قرايبي بـ مجموعات ضخمة من الشباب جايين عشان يتبرعوا!.. أنتم مين؟.. إحنا اللي باعتنا "حسام".. مين "حسام"؟.. مش بيردوا!.. اتصلوا بيا يسألوني أنت بعتت حد اسمه "حسام"؟.. قولتلهم لأ أنا ماطلبتش الطلب من حد معين أنا كتبت بس.. عشان يكتشفوا بعد كده وأنا معاهم إن "حسام" ده شاب مصري أصيل وجدع قرأ البوست بتاعي ومايعرفنيش بشكل شخصي فأتصل بزمايله اللي كانوا في رحلة في نفس المحافظة اللي قرايبي فيها وطلب منهم إنهم يقسموا نفسهم ويطلعوا على الـ 3 مستشفيات يتبرعوا بالدم للمصابين.. الغريب إن زمايله وافقوا بدون ما هما كمان لا يكونوا عارفين قرايبي ولا عارفيني!.. أنا مقدرتش أوصل لـ "حسام" ده بعد كده بالمناسبة ولا هو حاول يتواصل معايا بس التصرف بتاعه وبتاع زمايله أكدلي إن الخير هيفضل موجود للأبد طول ما ولاد الحلال موجودين. • الخير دايرة، والشر دايرة.. زى ما بتعمل زى ما هيتعمل معاك.. فعل الخير مش بيضيع، والنية الحلوة جزاءها رزق كبير، واللسان اللي صاحبه بيراعي غيره ودانه مش هتسمع غير لُطف، والقلب اللي مش بيشيل غير محبة عُمر الخوف ما هيسكنه.
