أحدث الأخبار مع #الحكايةدي
مصراوي
١٨-٠٣-٢٠٢٥
- ترفيه
- مصراوي
عمرو قورة: هذه أسباب منافسة "mbc مصر" لقنوات المتحدة.. والعوضي وعمرو سعد "مش مكسرين الدنيا"
قال عمرو قورة، الخبير الإعلامي، إن عدد المسلسلات الرمضانية يفوق قدرة أي شخص على متابعتها. وأضاف في حوار يُنشر لاحقا على مصراوي: المسلسلات كتير أوي عن قدرة الناس أنها تتابعها، العدد وصل لـ42 عملا، أنا مثلا مهتم بالموضوع وبتفرج على 6 مسلسلات، مش ممكن أكتر من كده، صعب جدا تلاقي حد بيتفرج على كله، كلهم مسلسلات حلوة، ده مجهود ناس اشتغلت.. وحلو أو وحش ده يرجع لذوق كل واحد. واعتبر قورة أن قناة mbc مصر استطاعت منافسة قنوات المتحدة بشكل عام، قائلا: الحاجة المهمة جدا، mbc مصر بتنافس كل قنوات المتحدة، بسبب أنهم قناة واحدة، أنت بتظبط قناة ومش بتقلب، عندك برنامج رامز وبعديه العتاولة وبعديه المداح، وبعديه أشغال شاقة جدا، من وقت الفطار حتى 12 صباحا، مميز جدا وغير مشتت، لكن في المتحدة عندك 4 قنوات على الأقل + قنوات الدراما.. بيني وبينك صعب أقلب ونلحق ده ونلحق ده، وكمان مفيش اهتمام بالمواعيد، بمعنى لو كاتبين شاهدوا المسلسل الساعة 8 م ممكن ميبدأش قبل 9 م، بسبب الإعلانات ومحدش هينتظر، بتروح للمنصة أو تركز على قناة واحدة وهي mbc مصر. وأوضح قورة: كلامي ليس معناه أن جودة مسلسلاتهم أحسن، لكن أسهل للمتابع، بتفرج على حاجة وعارف اللي بعده. وكشف قورة سبب منافسة mbc مصر، قائلا: تشتيت المشاهد ليس أمرا جيدا، أنا لو مكان الشركة المتحدة، اشتغل بقى إعادات في كل القنوات، وأختار قناة أو 2 بالكتير يذيعوا المسلسلات، لكن كون المسلسل هنا وبعديه مسلسل تاني في قناة تانية متلحقش بدايته ده أمر مزعج، وأعتقد دي آخر سنة هتحصل فيها الحكاية دي. وعن إمكانية خفض عدد المسلسلات في رمضان المقبل، قال الخبير الإعلامي: أنا أنادي منذ سنوات بفكرة الـ15 حلقة، وبالتالي أنا بالنسبة لي إن المسلسلات الكتير أوي كده صعب تعوض فلوسها من موسم رمضان. وأضاف قورة: الصح، ربع هذا العدد، ربع الـ42 مسلسل، يعني 10 مسلسلات، ويبقى على قنوات المتحدة 6 مسلسلات وmbc مصر هي حرة تعمل اللي هي عايزاه، إحنا بنهرج، محدش هيقدر يتابع أكتر من كده. وتابع عمرو قورة: كمان فيه حاجة مهمة، ناس تقولي مسلسل عمرو سعد أو أحمد العوضي، مكسرين الدنيا، وكل مصر بتتفرج عليهم، وأنا لا أعتقد ذلك، هم بيتوجهوا للمشاهد c وd، عايش في الأرياف، غلبان شوية ميقدرش يشترك في منصة وهم شريحة كبيرة، لكن مين بيدفع الإعلانات، بالتأكيد المعلنين الكبار. وأكمل الخبير الإعلامي: أنا مرة قولت على مسلسل مش حلو وكلموني من الوكالة اللي عاملة المسلسل، وقالوا أرجوك المعلنين هيبطلوا يشتغلوا شيل البوست، استغربت جدا، قالي أنت كل المعلنين أصحابك واللي بيأثر على المعلنين واحد زيي يكتب كلام، لكن دي شغلتي، مش شرط عندك 80% من المشاهدة لكن الـ 20% هم اللي بيصرفوا على الإعلانات، إحنا كمان غلطتنا الأساسية معندناش شركة أبحاث مظبوطة.
الكنانة
١٨-٠٣-٢٠٢٥
- منوعات
- الكنانة
ساعة عصرية حكاوي بالعامية مولد وصاحبه غايب
صباح الخير أو مساء الخير مثلا يعني المهم خير إن شاء الله ، خير اللهم اجعله خير قلبي مرفرف زي الطير وحاجة كدة مش عارف في ايه بالظبط … زحمة يا دنيا زحمة زحمة ولا عادش رحمة زحمة يا دنيا زحمة مولد وصاحبه غايب ، في أحداث كدة بتبقي مستفزة تحس انك مش قادر تسكت لازم تتكلم وإلا حيحصلك حاجة . النهاردة اللي هوة تاريخه ٣/١٨ ، ١٨ رمضان مجموعة شباب داخلين علي سوق الجملة في العامرية بخرطوش وسكاكين طيرة و داخلين يتعاركوا واتصدي ليهم ناس من السوق طبعا بطريقة عشان خاطرنا والناس غلابة ، بالمحايلة يعني ، احداث كتير في السوق فيها بلطجة وفرض سيطرة ، مجموعة من العاطلين الفاشلين هم مش عاطلين رغما عنهم ولكن برغبتهم بيلموا اتاوة علي العربيات اللي بتخش تحمل من السوق ، تجار الحشيش والبرشام متواجدين في كل مكان في السوق ، خلي بالك أنا مش بتكلم علي سوق عادي ده سوق جملة وحواليه سور وليه بوابات وعلي البوابات موظفين وكمان فيه نقطة شرطة ، الغرفة ليس لها أي سيطرة ، في تعديات من قبل أصحاب المحلات علي الطريق في داخل السوق لدرجة إن مفيش مكان للعربيات تمشي ، والغرفة التجارية ليست هنا . موضوع نظافة السوق ونظافة حمامات السوق وصيانتها ، في حد مكلف بالموضوع ده لكنه مجرد وهم لا وجود له ، اللي بيعمل صيانة للحمامات هم التجار والعمال عملوا تجديدات للحمامات ، موضوع النظافة للشوارع …في أيام الشتا متعرفش تمشي في السوق من الطين ، الوهم ده بيظهر وقت قبض الفلوس بس بعد كده ملوش اي اثر . نقطة الشرطة ملهاش اي دور في السوق ، مجرد دور شرفي اللي هوة احنا عندنا نقطة شرطة ، وعندنا فضائية علي رأي خالتي نوسة . بجد حاجات تفرس وتغيظ ووضع مستفز ، في السوق الوضع مسخرة شوية عيال صيع حاكمين السوق وموظفين الغرفة والشرطة لا سيطرة لهم علي شىء والكل في الاخر بيتراضي . تجار المخدرات منتشرين بشكل كبير في السوق ، وبيدفعوا أرضية عشان يبيعوا بحرية ، و كل واحد ليه زبائن محدش يتعدي علي زبون التاني ، و مينفعش حد من برة يخش يبيع جوة السوق ، ناس محترمة وملتزمة بالتقاليد ، انتو متخيلين الحكاية دي …. المتسولين منتشرين بطريقة غريبة في السوق خاصة في رمضان ، بعض الستات بتيجي من مدن تانية كل شغلتهم التسول و بيرجعوا بلدهم بعد رمضان ، التسول بقي مهنة مش لأنهم محتاجين وبيخترعوا طرق غريبة ليه ، ابتكارات وافكار المهم ازاي يقدروا يخلو اللي قدامهم يدفع ، جيب الزبون هو هدفهم الاول أما الوسائل فمتعددة ، بعض الستات بيقصدوا الاحتكاك بالهدف لامانع من بعض اللمسات من الهدف لجسد الهداف ، يعني مش بترد ايد حد يلمس جسمها المهم تاخد منه الفلوس … مواضيع كتير في السوق ….
