أحدث الأخبار مع #دبِّلليهو
كورة سودانية
منذ 12 ساعات
- رياضة
- كورة سودانية
دوري (دبِّل ليهو)!!
صَـابِنَّهَـا محمد عبد الماجد دوري (دبِّل ليهو)!! على ناس المريخ ـ مجلس الإدارة والإخوة الأفاضل في المكتب الإعلامي للقلعة الحمراء أن يجهِّزوا منذ الآن تهنئة كبيرة قدر (الليلة وباكر)، تهنئة غليدة للهلال الذي فاز في ظروف الحرب ببطولة الدوري الموريتاني – السوداني (دبِّل ليهو) أو اقترب من ذلك بإذن الله بعد أن أصبح الفارق بين الهلال البطل المُتوّج أو المُشرف ووصيفه بطل الدوري على الأندية الموريتاتية نواذيبو (5) نقاط قبل نهاية الدوري بجولتين، مع مباراة إضافية مُؤجّلة للهلال. كلِّموا ناس المريخ يجهِّزوا تهنئتهم للهلال، يرفعوا إيدهم ويعلوا صوتهم ويقوموا يبشِّروا في العريس ويباركوا ليه بعد أن حقّق الهلال بطولة الدوري الموريتاني ـ السوداني (دبِّل ليهو) في ظل الحرب المشتعلة في السودان والهلال يلعب غريباً أو ضيفاً على الدوري الموريتاني السوبر. فوز الهلال بهذا اللقب إن شاء الله سوف يكون تاريخياً، وهو سوف يكون لنا ذكرى خالدة بعد انتهاء الحرب ـ الآن أو لاحقاً سوف نقول لأولادنا وأحفادنا إنّ الهلال أثناء الحرب فاز بالدوري الموريتاني – السوداني (دبِّل ليهو)، الحرب سوف تصبح ذكرى. تاريخية هذا اللقب (دبِّل ليهو) تأتي من كونه لم يسبق لفريق أن حقّق لقباً خارجياً بالفوز بدوري غير دوري بلاده، أعتقد ذلك، لا أقطع بهذا.. فليبحث لنا الدكتور علي عصام عن هذا الأمر ـ هذا حدثٌ فريدٌ ونادرٌ وغريبٌ في نفس الوقت، خاصةً أنه يحدث في موريتانيا الدولة الشقيقة التي نحبها كثيراً، وقد أحببناها أكثر بعد أن شارك الهلال والمريخ في الدوري الموريتاني، فوجدنا من الإخوة الموريتانيين في كل القطاعات كل احترام وتقدير وحُب. الفوز بالدوري الموريتاني – السوداني (دبِّل ليهو) إنجازٌ عظيمَ للهلال سوف يُكتب في السجلات وهو حدثٌ لا أظنه سيتكرّر لنا أو لغيرنا بعد ذلك، ومن هنا تأتي غلاوته ـ ربما يحدث ذلك كل مائة عام.. قوة الدوري الموريتاني تظهر في المركز الذي يحتله المريخ الآن ـ سادس الدوري ولا أظن أنّ في إمكانية المريخ أن يتحسّن مركزه أكثر من مركزين، على أفضل الأحوال، كذلك أحسب أنّ الكرة الموريتانية مُتطوِّرة، كفى أننا شهدنا تنظيماً بديعاً للدوري الموريتاني وهو أمرٌ كنا نفقده نحن في السودان حتى قبل اشتعال الحرب ـ وأتوقع أن يحدث تطورٌ أكبر في الدوري الموريتاني والكرة الموريتانية في السنوات القادمة بصورة أكبر، خاصةً أن ممثلي الكرة الموريتانية يتواجدون في كُبرى الأندية الأفريقية، وفي بعض الدوريات الأوروبية وسوف ترتفع رقعة تمثيلهم بصورة أكبر في الفترة القادمة، وسوف نقول كلما تُحقِّق الكرة الموريتانية نجاحاً، إنّ الهلال سبق أن فاز بالدوري الموريتاني – السوداني (دبِّل ليهو) ـ أحفادنا ح يقولوا لينا دي حصلت كيف؟ ح نقعد نحكي ليهم. ح نقول ليهم الهلال كان عندو مدرب طلس ـ مدرب قاعد ساكت جعل الهلال يصل لدوري الثمانية في البطولة الأفريقية، بعد غياب عن هذه المرحلة لمدة عشر سنوات، وفاز بالدوري الموريتاني – السوداني (دبِّل ليهو) وهو غريبٌ علينا، مدرب قاعد ساكت أكيد، ما في مدرب بفوز ليه بدوري (دبِّل ليهو) في موسم واحد. ـ طبعاً من لهم رأي في فلوران من ناس الهلال ح يتفقوا لأول مرة مع المريخاب على أن الدوري الموريتاني ضعيفٌ، لا أعرف كيف يقول المريخاب ذلك على دوري يحتلون فيه المركز السادس (فضيحة السواد)؟! يتحدّثون عن ضعفه بعد أن خسروا فيه 9 مباريات، دوري خسروا فيه من رابع الطيش ومن ثالث الطيش ومن تاني الطيش ومن الطيش في عضمو، يبقى ضعيف كيف؟ حيث أصبح فارق النقاط بين الهلال والمريخ 17 نقطة وللهلال مباراة مُؤجّلة ستجعل الفارق إن شاء الله على أقل تقدير 20 نقطة. الكلام دا بعد النمير وبعد مدرب إيطالي ومدرب سوداني ومدرب صربي ومدرب مصري والفرق يمكن أن يكون بين الهلال والمريخ 20 نقطة، فضيحة السواد (دبِّل ليهو).. أتاريهم ناس أسامة عطا المنان وعامر عثمان كانوا ساترين فضائح.. كانوا شايلين بلاوي!!! 20 نقطة وبهاجموا في فلوران ـ أتحدث عن ند الهلال فريق المريخ الذي يبقى كبيراً في كل الأحوال. دي ما حصلت قبل كدا ـ الرقم القياسي بين الهلال والمريخ في الدوري السوداني كان مسجل بفارق 18 نقطة لصالح الهلال، هذا الموسم ممكن الفارق يبقى 20 نقطة!!! الفأر كان عندو دور!! فضيحة السواد!! (دبِّل ليهو). كلو من فلوران ـ بعمل في حاجات غريبة.. إنت بتعمل في حاجات زي الورد.. (دبِّل ليهو). طيَبعاً المنتقدون لفلوران ممكن يقولوا ليك المريخ ضعيف وظروف الحرب وعدم الاستقرار الفني، طيب إنتوا يا فالحين وقت عارفين عدم الاستقرار الفني بعمل كدا، ليه بتطالبوا بالإطاحة بفلوران، عاجبكم عدم استقرار المريخ؟! (منطق غريب)، أما الحرب فهي كما وقعت على المريخ وقعت على الهلال.. إنتوا بتتكلموا عن الهلال السوداني وليس الهلال السعودي. وعن ضعف المريخ فالمريخ يبقى المريخ حتى لو شال الكورة وهرب. وهل هنالك ضعف أكثر من ذلك؟ فقد كان ذلك يحدث في السودان. أما من يُشكِّك أو يُقلِّل من قيمة الدوري الموريتاني من ناس الهلال، فنقول لهم إنّ الهلال لم يأتِ للدوري الموريتاني من الدوري الإنجليزي أو الإسباني، وإنما جاء له من الدوري السوداني الذي يعاني في البرمجة والتنظيم ويعاني في الملاعب والتحكيم، وإن كان يتفوق الدوري السوداني على نظيره الموريتاني في الجانبين الإعلامي والجماهيري.. لكن حتى على مستوى النقل المنتظم للدوري الموريتاني في القناة الموريتانية يتفوّقون به على القنوات السودانية التي كانت تنقل الدوري السوداني، مع حاجة القناة الموريتانية لمراجعات في النقل التلفزيوني، إذ تبدو الصورة بعيدة إلى جانب إشكاليات في الإخراج والإعادة، ودي برضو حاجات نحن بنعاني منها. أضف الي ذلك تقنية الفيديو المستعلمة في الدوري الموريتاني وغائبة في السودان، وهو أمر يحسب لهم. فنياً، ليس هنالك أي أفضلية للدوري السوداني على الموريتاني ـ بل يمكن أن يتفوّق الدوري الموريتاني على السوداني في السرعة والقوة البدنية واللياقة. المهم يا جماعة الكلام دا بنرجع ليه تاني، بس كلِّموا ناس المريخ وذكِّروهم بتهنئة الهلال، خلوهم يجهِّزوا لينا تهنئة معتبرة.. تهنئة غليدة (دبِّل ليهو) ـ نحن ممكن نسامح في أي حاجة إلا في التهنئة دي. الهلال حقّق بطولة مركبة بفوزه بالدوري الموريتاني ـ السوداني (دبِّل ليهو)، فهو إلى جانب تغلبه وتصدره على كل الأندية الموريتانية، بما في ذلك نواذيبو الذي حقّق البطولة قبل هذا الموسم سبع مرات على التوالي، ليأتي الهلال ويتغلّب عليه في دوريه ويُحقِّق ما فشلت فيه كل الأندية الموريتانية، الهلال إلى جانب هذا الإنجاز هو تصدّر وتغلّب في البطولة الخاصّـة التي تجمعه مع نده المريخ، بحساب المواجهات المباشرة وبحساب حصيلة الهلال في النقاط والأهداف في الدوري الموريتاني.. لهذا نطلق على الدوري الموريتاني – السوداني الذي يجمع بين القمة السودانية الهلال والمريخ والأندية الموريتانية دوري (دبِّل ليهو)، لأنّ الهلال حقّق البطولة دبل، الموريتانية والسودانية، دوري تربيع، لذلك نحن نُطالب بتهنئة ليها (ضُـل) من ضُـلنا حتى في الدوري الموريتاني ـ غايتو الزول وقت يكون (ضُـل) يكون ضُـل طول عمره، في السودان وقت شالوا الكورة في أول بطولة للممتاز، وفي تنزانيا التي انسحب فيها المريخ من أمام الهلال في السوبر السوداني بعد التسخينة ـ وفي سيكافا الأخيرة التي انسحبوا عنها أيضاً، وفي الدوحة (والي الدين)، وفي أبوظبي (النعسان)، وفي نواكشوط (الغربال).. ضُـل في أي حتة، في أي زمان وأي مكان. عايزين تهنئة (دبل)، وقت بتعرفوا تهنوا ما بنخلِّيكم، زمان كنا بنلقى ليكم العُـذر، لكن تاني ما عندنا ليكم عُـذر. يلا هنوا ـ يلا صفِّقوا كلكم. زمان كان عندنا قريبنا اسمو (عباس خلي الملامة عليّ)، كنا بنقول ليه كدا، عشان كان زول لوّام لوم شديد، محل ما يلاقيك بتكسر ليك لوم، مرات تزوغ منو، ومرات تخلي ليه الشارع، عشان لو وقّفك ما بفكِّك. يدور فيك لوم زي عريضة الطلاق!! عباس خلي الملامة عليّ، كان وقت يلاقيك في مناسبة زواج بمسكك في العقد ويقول ليك: إنت مالك ما بترد على تلفوني؟ تقول ليه ضربت لي متين؟ يقول ليك الشهر الفات، قبل 21 يوماً كدا تقريباً زي الساعة (7) صباحاً. تقول ليه (7) صباحاً ضارب لي مالك؟ إن شاء الله خير؟ (7) صباحاً لو ضربوا مصنع الشفاء ما بقوم، عاوز إنت وقت تضرب تلفوني أقوم أرد ليك!! يا راجل قول كلام غير دا. يقول ليك أبداً، بس كنت بتغالط مع المــدام، الكبير إنت والّلا أخوك الكبير؟ وإنت عارف الغلاط دا ما بقعد لي بعدين.. ما بنتظرها إلى أن تشرق كويس. تقول ليه الغريبة رقمك مسجل عندي، لكن رقمك ما جاتني منو مكالمة. يقول ليك يجيك كيف؟ أنا ضربت ليك من رقم تاني. تقول ليه: والله ما عرفتك.. يقول ليك يعني إنت ما بترد على رقم غريب!!!؟ خلاص تاني بعمل ليك رسالة، قبل ما أضرب ليك، بس رد علينا، عشان الصباح دائماً أنا والمرا بنبدأ يومنا بالغلاط.. نقعد نتغالط كدا لامن تشرق، وبنحتاج ليك مرات في بعض المسائل. بنشرب الشاي بالغلاط بدل الزلابية. تقول ليه جداً. عباس خلي الملامة عليّ، مرات يلاقيك في المقابر، ويقول ليك: يا زول إنت مالك ما بتسلم، يوم داك شايفك من بعيد في المولد النبوي قدر ما رفعت ليك إيدي ما ردّيت عليّ، ولا عبّرتني، بعدين مالك ضعفت كدا؟ ضربك سكري والّلا دي الحرب؟ تتجاوز موضوع الضعفة دي وتقول ليه والله ما شفتك، أشوفك كيف في المولد مع الخلق دي؟ يقول ليك يا زول أنا كنت ظاهر، لابس طايقتي الحمراء، معقولة تكون ما شفتني. تقول ليه: والله ما شفتك. يقول ليك: خلاص عليك الله تاني طاقيتي الحمراء دي لو لاقتك في أي حِتّة أعرف طوالي دا أنا، عباس… عباس خلي الملامة عليّ بقول في الكلام دا والناس بتدفن، والميت بيسألوا فيه والمشيعون بيدعوا ليه. الفايق لي طاقيتك الحمراء منو؟ وعباس خلي الملامة عليّ مرات بتلقاه في الكورة، الجابو اليوم داك الاستاد شنو ما عارف؟ محل ما تقبِّل تلقاه قدامك متل البرّاد الصيني. الليلة الله يحلّنا. من اَشوفو بقنع من الكورة. يقوم يخلِّي الكورة ويمسكك إنت، ما تفهم أي حاجة في الكورة، من التسخينة يشبكك إنت ما سمعت بي التايا بنت جاب اللبن. تقول ليه التايا بنت جاب اللبن مالها؟ يقول ليك ماتت. تقول ليه متين؟ يقول ليك يا زول إنت قاعد وين؟ الزولة دا على الأقل كدا ماتت قبل خمس سنوات، أو سبع سنوات. تقول ليه ما سمعت بيها ـ أصلاً أنا ما بعرفها. يقول ليك، عشان كدا أنا زعلان منك.. ما تعزيني في التايا بنت جاب اللبن؟ تقول ليه وإنت علاقتك بي التايا بنت جاب اللبن شنو؟ يقول ليك كيف؟ إنت ما بتعرف حسن تور الجك؟ تقول ليه ما بعرفو. يقول ليك ما بتعرف صلاح ود كترينا؟ تقول ليه ما بعرفو. يقول ليك طيِّب ما بتعرف تاج السر السنم؟ الزول دا هو وجدك المات سنة 64 قرأوا خلوة في الدامر.. قول ما بتعرفو كمان؟ كانوا دفعة واحدة !!.. أنا دفعتي ما عارفها، عاوزني أعرف دفعة جدي اللي مات سنة 1964م. تقول تتخارج منه عشان تأخذ ليك نفس بين الشوطين والله الجري الجريتو مع عباس خلي الملامة عليّ، حكم المباراة ما جراهو.. تقول ليه أيوه بعرفو… يقول ليك التايا بنت جاب اللبن القلت ما بتعرفها ديك.. تاج السر السنم بيبقى ليها خالها باللفة. تقول ليه وعلاقتك إنت بالموضوع شنو؟ يقول ليك كيف: العراقي بتاعي السمني المُشخّط خيطتو عند خال التايا بنت جاب اللبن الشفيع السنم أخو تاج السر السنم البتكلم ليك عنو من بداية المباراة لغاية ما الحكم الرابع ما رفع الزمن البدل الضائع. العراقي السمني بتاعي تعرفو؟ مرة ادّفق فيه شاي لبن ـ الطيب سجلات عينو حارة مرة شافو، قال لي مالك قصير كدا؟ عامل زي فتيل الريحة لمن يكون في آخرو، تدسو في آخر الدولاب وقبل ما تتريّح منه تعاين ليه سمح في حسرة، من اليوم داك تاني ما شفت لي عافية ـ أقوم وأقع من ملاريا لي تسمم زي شافع التسنين، الله يلعنو الطيب سجلات عينو زي اللجنة الشعبية ما بتريّح ليها زول.. زي لوح الطاقة!! تقول ليه: طيِّب البخليني أعزيك عشان خياطة عراقيك السمني شنو؟ كمان العراريق دخلت في صلة الرحم؟ والّلا عشان لونه سمني؟ تقوم تقيف فجأة، بعد ما روحك تطلع وأقول ليه خلاص أنا طالع، عشان ألحق المواصلات قبل الأبواب ما تزدحم، الزمن بدل الضائع دي عندك حاجة عاوز تقول ليّ فيه؟ يقول ليك أبداً، بس عليك الله لمن نضرب ليك رد على التلفون، عشان مرات أنا والمرا بنقعد نتغالط وبنرجع ليك في بعض المسائل. تقول ليه جداً.. وإنت طالع كدا، الحكم يصفر معلناً نهاية المباراة، بتشوف أقرب زول جنبك في المدرجات وإنت في الطريق للباب وتقول ليه: أسمع الكورة انتهت كم؟ الزول بعاين ليك كدا وبفتكرك من بتاعين الملح البدخلوا بعد ما يفتحوا الأبواب، وبقول ليك، الواحد طول وعرض ولابس نضيف، ويدخل ملح، إنتوا وقت بتحبوا الكورة ما تدفعوا. عباس خلي الملامة عليّ مرات بلاقيك في الفرن. بقول ليك إنت مالك ما بتكفِّر لي؟ تقول ليه مالك، أكفِّر ليك شنو، تراكا شديد ولضديد متل الحصان، يكفِّروا ليك في شنو؟ يقول ليك الأسبوع الفات كانت عاوز تقرصني عقرب، والله مرقت منها بي بنط.. مرقت منها بكرامة البليلة. تقول ليه: والله ما سمعت بيها، ولو العقرب لدغتك، كنا بنجيكم عشان نكفِّر للعقرب. بفتكرك بتهظر وإنت قاصدها!! تقوم تفوت تخلي العيش، خليهم يعملوا أي شئ، كسرة، قراصة، عصيدة، إن شاء الله ما نأكل، بس نتخارج من الفرن دا. وعباس خلي الملامة عليّ، مرات بلاقيك في المستشفى وإنت بين الحياة والموت، شغّال فحص وكشف، يمسكك في غرفة الموجات الصوتية، ويقول ليك: بنتي يخطبوها ما تبارك ليّ؟ تقول ليه، إنت عندك بنت؟ بقول ليك إيمان بنت عمتك خطبوها. تقول ليه وإنت علاقتك بي إيمان بنت عمتي شنو؟ يقول ليك إنت ما عارف إيمان دي زي بنتي، أكلت سمايتها وشربت شاي اللبن في السماية حقّتها بالزلابية، وما تبارك لي؟ تقول ليه لكن إيمان دي أقرب لي منك.. إنت مفروض تبارك ليّ. يقول ليّ يا زول إنت نسيت، أنا شربت في سمايتها شاي اللبن بالزلابية، إنت شربت في سمايتها الشاي باللبن بالزلايية؟ أقول ليه أبداً؟ يقول ليّ طيِّب مالك؟ تقوم تسكت يمكن علاقة الزلابية بي شاي اللبن في الزمن دا بقت أقوى. زي العراقي السمني!! والطاقية الحمراء. يمكن البلد دي أي حاجة فيها بقت جائزة. قبل ما يفوت بقول ليك أسمع خلي تلفونك فاتح يمكن نضرب ليك في أي وقت، عليك الله لو مسكلت ليك أرجع ليّ.. الشبكة مرات بتكون كعبة، عشان كدا يمكن أمسكل ليك (4) صباحاً، عليك الله أرجع لي ما بكون عندي رصيد.. خلي الغتاتة وأرجع ليّ من أول جرس، أنتوا القروش دي عاوزين توديهو وين؟ أقوله تمسكل ليّ (4) صباحاً ليه أنا دكتور نساء وتوليد؟ لكن عشان أقفل الموضوع بقول ليه جداً، وأقوم بدون ما أشعر 'كركرب أجي واقع'.. نسيتوا إني في المستشفى. الجماعة بقولوا للدكتور يا دكتور الزول دا مالو؟ الدكتور بعاين لي الموجات الصوتية وبقول ليهم الزول دا هسع في وقفتو دي طقتو مُسيّرة. دا شغل مُسيّرة عديل ـ الدكتور ما عارف عباس خلي الملامة عليّ، أخطر من المُسيّرة. أها أنا عاوز أعمل لي ناس المريخ زي ما عمل لي عباس خلي الملامة عليّ، يمين ما تهنئوا الهلال بالدوري الموريتاني السوداني (دبِّل ليهو) أشبككم زي الفاتح جبرا رحمة الله عليه وقت شبك الجماعة بمطار هيثرو. يلا صفِّقوا كلكم!! … متاريس نحن ما بنخلي حقنا، أقصد ما بنخلي تهنئتنا. يا تهنونا يا تهنونا. الدوري دا نحن تعبانين فيه وإنتوا الجهاز الفنى حقكم بقى زي (غيار الزيت) كل شهر بتغيِّروه!!.. دوري غيّرتوا فيه الجهاز الفني 4 مرات واحتليتوا فيه المركز السادس ـ أنا ما عارف علي جعفر دا في شنو؟ المركز دا ما عاوز ليه مدير كورة، ولا عاوز ليه حارس مرمى. أكيد ثلث كشف المريخ مُهدّد بالشطب بعد التقارير التي وصلتنا من جان كلود، إذا أقيم الدوري السوداني. يمين كسلا فيها حلاة فتك ومتك. نصيحة لمصعب مكين، الكلام دا ما بتقدر عليه، أحسن شيل دفتر العيادة. نحن زمان كنا بنزوغ من الاختبارات وحصة التسميع بي دفتر العيادة. نحن كنا شفوت. وعارفين أي حاجة. الشئ البضحِّك، ناس المريخ عادي ينسحبوا من أمام الهلال، فعلوها في السوبر السوداني وفعلوها في سيكافا، هسع بلاحقوا في الاتحاد عشان ينظم الدوري السوداني.. ولمن تأتي ساعة الجد بنسحبوا!! يا كابو خليك قريب. جان كلود دا ناس مصعب مكين ما بقدروا عليه. … ترس أخير: صلاح نمر بكون أكتر زول مَبسُــوط من جان كلود الأيّامَـات دي.
كورة سودانية
١٣-٠٤-٢٠٢٥
- رياضة
- كورة سودانية
جَـدولَ الضـرب المُوريتاني!!
صَـابِنَّهَـا محمد عبد الماجد جَـدولَ الضـرب المُوريتاني!! هذا المُـوسِـم لم أركِّـز كثيراً مع المريخ، اعتبرتهم في مُهمّة سِريّة وهم يلعبون في الدوري الموريتاني، ونسيت موضوعهم بعد أن خرج المريخ من الدور التمهيدي في البطولة الأفريقية من زمن حفروا البحر وقبل أن تُحَـرّر مدني، عندما كانت الخرطوم جريحة تحت سيطرة المليشيات بكباريها وقصرها الجمهوري، عادت الجزيرة وعادت الخرطوم ولم يعد المريخ!! يشيلوا جهاز ويجيبوا جهاز، ما خلوا حاجة.. بدّلوا المدرب، وبدّلوا المحترفين، وبدّلوا الرئيس، وما فاضل ليهم بعد كدا إلا يجيبوا للمريخ (المشتركة)، كل الحلول لم تُجْــدِ في المريخ. الشغل دا شغل (قوات مشتركة).. مشتركة عديل كدا. المؤتمر الوطني ، الدعم السريع ، ثورة . جمال الوالي ، ونسي ، محمد الشيخ مدني ، سوداكل ، القنصل ، ابوجيبين ، النمير ، بالتزكية بدون تزكية ، بالإنتخاب ، بالتعيين كله جربوه في المريخ. والتمهيدي تمهيدي. حال المريخ زي حال البلد !! المسافة بين الهلال والمريخ أصبحت بعيدة، الفارق بين الهلال والمريخ في الدوري الموريتاني يمكن أن يصل إلى أكثر من 20 نقطة، أما في البطولة الأفريقية، فقد خرج المريخ من مرحلة التمهيدي كالعادة، وخرج الهلال من ربع النهائي. بين الهلال والمريخ صحارٍ وفيافي ومحيطات وجبال، الهلال وين؟ والمريخ وين؟ الهلال في كل موسم يُنافس الأهلي المصري وصن داونز والترجي التونسي والمريخ يخرج كما اعتدنا من التمهيدي. التمهيدي باللبن. تمهيدي سادة. تمهيدي بالسمنة. التمهيدي بالشنقيطي. تمهيدي بدون شنقيطي. تمهيدي والأجر على الله. وتمهيدي كما يكون. وتمهيدي كما يجب. في الحرب بطلعوا من التمهيدي، بدون حرب برضو بطلعوا من التمهيدي. الجماعة ديل مع كثافة (التمهيدي) العايشين فيه ومع تمهيدي القولون الذي يعانون منه، بتكلموا عن الهلال وخروجه من ربع النهائي في بطولة الأندية الأفريقية للأبطال. تناسيتهم، رغم إنّي كنت تقريباً كل 72 ساعة أسمع عن هزيمة جديدة للمريخ في الدوري الموريتاني، قلت يا ربي الشئ دا جد واللّا الكاميرا الخفية؟ جد واللّا رامز جلال؟ حتى شعرت أنّ المريخ يُشارك في جدول الضـرب الموريتاني وليس في جدول الدوري الموريتاني، وحتى آخر مباراة، فإنّ المريخ من جملة 25 مباراة خسر 9 مباريات وتعادل في 6 مباريات ولم ينتصر إلّا في 10 مباريات. خسر المريخ قبل خمس جولات من نهاية الدوري الموريتاني 39 نقطة، وأصبحت شباكه مثل الميناء البري في مدينة عطبرة تستقبل كل الوافدين والقادمين برحابة صدر وتبشير. المريخ بوضعه هذا تخيّلوا أنّ إعلامه يسخر من الهلال، ولا أقول جمهوره، لأنّ جمهوره بالوعي الذي يجعله لا يسخر من الهلال كما فعل إعلام المريخ من خسارة الهلال من الأهلي المصري في ربع نهائي البطولة الأفريقية!! صحيفة الرد كاسل الإلكترونية، كانت قد صدرت بعد خسارة الهلال من الأهلي بهدف في نواكشوط بعنوان (دبِّل ليهو) مع وضع صورة أمام عاشور كغلاف للصفحة الأولى، وهذا شئٌ لم تفعله حتى صحيفة الأهلي المصري، رغم أنّ (الدبل) سبقنا إليه المريخ وفي الدوري الموريتاني عندما خسر من فريق الشمال الموريتاني في الذهاب والإياب، فأيِّ (دبل) بربكم أولى بالسخرية والنقد؟!! الدبل من الأهلي أم الدبل من الشمال؟ المريخ خسر من الشمال في الذهاب بنتيجة أعرض من خسارة الهلال في ذهاب دور الثمانية أمام الأهلي في القاهرة، وخسر المريخ في إياب الدوري الموريتاني بنتيجة أعرض من خسارة الهلال أمام الأهلي في إياب نفس الدور بنواكشوط، و(دبل) المريخ في خسارته من الشمال في الذهاب والإياب كانت بواسطة لاعب واحد. إنتو رايح ليكم (دبل)..؟ دبل شنو البتكلم عنه فريق خرج من التمهيدي؟ من زمن الفردة الثالثة في جوز الحمام (قوات أمم متحدة)!! صحيفة الرد كاسل التي يرأس تحريرها الزميل ياسر المنا ظلت تكتب أنّ هذه النسخة هي الأسوأ للمريخ في تاريخه، وخرجت بعد الخسارة الأخيرة أمام أسنيم تتحدث عن حال المريخ وتقول إنّ حال الفريق كحال الإدارة، والإدارة كراسي فاضية. والصحيفة التي سخرت من خسارة الهلال من الأهلي في غلافه، ووضعت صورة إمام عاشور على صدر الصفحة الأولى، جاءت ووضعت في نفس الصفحة صورة لاجتماع لمجلس إدارة المريخ غاب فيه كل الأعضاء، وحضرت الأوراق والدفاتر وعرضت الكراسي وهي خالية، هذا هو المريخ.. حسب كلامهم (كراسي فاضية).. هسع الكلام دا لو قلناه نحن يقعدوا يزعلوا، هم عادي عندهم!! هيثم كابو وين؟ إنّهم يردون على أنفسهم ويكفونا رهق الرد، فليس هناك أسوأ مما يُكتب عن المريخ من إعلام المريخ، فماذا نقول نحن وهم في المريخ قطعوا بأنّ هذا الموسم أو هذا المريخ هو الأسوأ للمريخ في تاريخه الكبير. نحن تاني نقول شنو أكتر من كدا؟ صحيفة مريخابي الإلكترونية كتب فيها الزميل عصام هجو تقريراً يمكن أن يكون الأغرب في التاريخ الحديث، عندما تحدث التقرير واستنفر أئمة الجوامع لانتقاد الهلال على صرفه الدولاري على الفريق كما كانوا يفعلون عندما تعاقد المريخ بصفقة تجاوزت الثلاثة ملايين دولار مع وارغو، فخرجت جوامع الخرطوم تنتقد قيمة الصفقة!! وقال هجو إنّ صفر الهلال الدولي هو أغلى صفر في ظل وجود 12 محترفاً في الهلال، ونسي هجو أنّ نفس العدد من المحترفين يتواجد في المريخ مع ذلك خرج من مرحلة التمهيدي في البطولة الأفريقية، وتعثر 15 مرة من جملة 25 مباراة لعبها المريخ في الدوري الموريتاني!! هسع الموضوع دا محتاج تصرف فيه دولار واحد؟!! والّلا قرش؟!! الذي تم صرفه في تمهيدي المريخ لم يُصرف في غزة حين دمروها ، وحين ارادوا تعميرها. دا أغلى تمهيدي في العالم يُصرف عليه بالعملة الصعبة!! تمهيدي في وجود 11 محترفاًَ..؟ ليه إنتو عاوزين (تمهِّدوا) شنو أصلكم؟ أنا تمهيدي بالشكل دا عمري ما شفتو؟!! المُضحك أنهم كانوا قد شكوا من سُـوء التغذية وسُـوء الوجبات التي تُقدّم لهم في موريتانيا (فضيحة السّـــواد)!! في زول في الحرب دي بتكلم عن الأكل..؟ «طيِّب لو كنتو في السودان وأكلتوا عدسه وسليقته وسخينته كنتو نزلتوا الدرجة الثانية»؟ على ما يبدو أنّ الأهلي المصري خرب طبعهم، خاصّةً في موضوع الأكل دا!! هجو الذي طالب أئمة الجوامع بمهاجمة وانتقاد مجلس إدارة الهلال على صرفه الدولاري لم يُحدِّثني ماذا يقول الأئمة عن محترف المريخ الكولومبي الصفقة الأغلى في سوق الانتقالات السودانية في الفترة الأخيرة، وهو محترف حسب تقارير إعلام المريخ نفسه يتقاضى راتباً يصل لعشرين ألف دولار في الشهر وهو راتبٌ لا يُمنح ربعه لقائد الجيش وهو يقود الحرب على المليشيا منذ أكثر من عامين!! هو الكلام بقروش؟ هذا الكولومبي لم يفتح الله عليه حتى وقتنا هذا بهدف في الدوري الموريتاني وربما هو لم يُسجّل حتى في التمارين؟ ماذا يقول أئمة الجوامع عن الهلال وفي المريخ 11 محترفاً أجنبياً خرجوا من التمهيدي في البطولة الأفريقية وخسروا 9 مرات في الدوري الموريتاني، من بينها كانت خسارتان أمام النادي الذي يتذيّـل ترتيب الأندية الموريتانية في الدوري الموريتاني. في المريخ، مُحلِّلٌ صربيٌّ ومُحلِّلٌ مصريٌّ وهذا العدد من الأجانب في التحليل الفني لا يُوجد حتى في الهلال البطل الذي وصل لربع النهائي الأفريقي. في المريخ، مديرٌ رياضيٌّ مصريٌّ، نازل وطالع وصارف بالدولار، وفي الهلال لا يُوجد هذا المنصب. الزول دا بخطِّط في شنو؟ وماذا يُدير؟ الضرب دا ما عاوز مدير رياضي، الموضوع دا علي جعفر كتير عليه. الجهاز الفني للمريخ يتكون من أجانب عددهم أكثر من أجانب الهلال في الجهاز الفني، وخلال كل 45 يوماً يُغيِّر المريخ جهازه الفني بعد أن يدفع مئات الآلاف من الدولارات للجهاز المُقال كما فعل مع الإيطالي السابق ويدفع مئات الآلاف من الدولارات للجهاز الفني الجديد كما فعل مع جهاز ميشو وطاقمه الجديد!! أئمة الجوامع الذين كانوا قد انتقدوا المريخ على صفقة وارغو فعلوا ذلك، لأن الصفقة كانت من تمويل الدولة وهذا أمرٌ لا يغيب عن أحـدٍ، عكس صرف الهلال الحالي على فريقه، إذ يصرف الهلال على نفسه من دخله وأرباحه، وسيعود للهلال من وصوله لربع النهائي في البطولة الأفريقية قرابة المليون دولار، وقد عاد للهلال قرابة هذا المبلغ من بيعه لمهاجمه الكونغولي ليليبو. الهلال يستثمر في لاعبيه وأدخل عملات صعبة للبلد في هذه الظروف، ومحترفوه الحاليون إذا أخذنا نموذجاً واحداً منهم وهو جان كلود الذي يتحدث العالم كله عنه يمكن أن يُدخل للهلال في هذه الظروف على أقل تقدير 3 ملايين دولار.. أئمة الجوامع يقولوا شنو في هذا الاستثمار وهذه الأرباح التي يحققها الهلال ووارغو مازال غصة في حلق المريخ، ومازال غصة في حلق الدولة؟ مشكلة المريخاب أنهم في أي وقت وأي مناسبة عاوزين يدافعوا عن جمال الوالي. الرئيس آدم سوداكال.. عاوزين يدافعوا عن جمال الوالي. الرئيس حازم مصطفى.. عاوزين يدافعوا عن جمال الوالي. الرئيس أيمن مبارك أبوجيبين.. عاوزين يدافعوا عن جمال الوالي. الرئيس عمر النمير.. عاوزين يدافعوا عن جمال الوالي. اطلعوا من جلباب جمال الوالي وعيشوا حياتكم.. المريخ يستحق منكم أفضل من هذا. عشان كدا هم شايفين كراسي المجلس فاضية. عليكم الله هسع في الهلال مع النجاحات التي حقّقها صلاح إدريس في زول في الهلال بتكلم عن صلاح إدريس أو بدافع عنه؟ الهلال بدخِّل عملات صعبة وإنتو قبل قيام الحرب بـ48 ساعة دخّلتوا إلى البلاد حفتر، الذي اجتمع بمجلس المريخ وأقطابه في السلام روتانا وتناول العشاء معهم، والحرب يُعد ويُرتّب لها في خفاءٍ أو في العلن، ولا أحدٌ يتحدّث ولا أحدٌ يعترض!! أئمة الجوامع يتكلموا عن الهلال والّلا عن الدعم؟ يتكلموا عن شنو؟ واللّا شنو واللّا شنو؟ خلوهم ساكتين أحسن. اتخيّلوا أئمة الجوامع، يتركوا خراب البلد ودمارها، فسادها وما يعيشه الناس من معاناة بسبب الحرب. يتركوا جرائم الدعم السريع والشفشفة عينك عينك ويقعدوا يهاجموا الهلال، الجهة الوحيدة التي تفرحنا في هذا الوقت. يخلوا من خرجوا من التمهيدي بـ11 محترفاً، وجهاز فني فيه أكثر من 8 أجانب ومحترف كولومبي بصرف راتب في الشهر بيصل إلى 20 ألف دولار ويقعدوا عشان خاطر جمال الوالي يهاجموا السوباط والعليقي والدولة هي التي تستفيد منهما وهما يدعمان الجيش والتكايا في هذا التوقيت.. (لا أستطيع أن أبرئهما ولكن أي شخص يملك إدانة عليهما أو يشهد لهما بفساد فليتقدّم). الذي أعرف ولا أجزم هنا كما أشرت قاطعاً أنّ حميدتي قائد الدعم السريع عندما كان يلاحق السوباط ويطارده بالقانون وبالابتزاز، كان يدعم بمستشاريه في المريخ ونحن دائماً للأسف نستعمل القانون للتعدي على الآخرين إذا كنا نمثل السلطة، في ذلك الوقت الذي أجبر فيه حميدتي رئيس الهلال على مغادرة البلاد، كان رئيس المريخ وحفتر في عشاء عمل بأحد فنادق الخرطوم الفخمة أو في منزل حميدتي، لا أدري وهم يتهامسون ويتسامرون قبل اشتعال الحرب بـ48 ساعة. إنتو بتعملوا الحاجات دي بالظاهر وتتهموا الناس بالباطل!! مع ذلك أقول، إننا نرحب بمحاسبة ومحاكمة كل ما يثبت عليه فساد أو يظهر عليه ثراء في زمن الحرب والمتاجرة بأزماتها وأوجاعها، وسوف نكون عوناً لكل الكتابات التي تشير إلى ذلك، ولكن من غير محاصصة، معاي أفعل ما يحلو لك وإن كان حراماً، ضدي لا تفعل حتى ما هو حلالٌ. أتحدّث هنا بلطف ولكن ساعة الجد، سوف ندعم ونساند كل من يحارب الفساد ويكشفه. … متاريس الهلال بيلعب في الدوري الموريتاني بتشكيلة غير متجانسة وبعيدة عن المشاركة، مع ذلك فإنّ الفريق الحمد لله ينتصر. بس مفروض فلوران يمنح الدوري الموريتاني في الفترة المقبلة اهتماماً أكبر. خاصةً أنّ الهلال ليس لديه شئٌ بعد ذلك غير الدوري الموريتاني. ومن ثَمّ السوبر السوداني في كريمة كما أعلن الاتحاد السوداني. التجهيز للسوبر السوداني مهمٌ.. كما أنّ الفوز الشرفي بالدوري الموريتاني سوف يكون حدثاً. على الهلال بعد الخروج الأفريقي، التركيز في الدوري الموريتاني. جرس كافي دق جرس الخطر في المريخ. وأحمد بيتر عندما كان موقوفاً وكانت عندو مشكلة في الجنسية كان أفضل ليه. بيتر ظهر بمستوى ضعيف وسجل فيه أسنيم هدفاً غريباً. بعد دا بهاجموا في أبوعشرين. راهنت على فشل ميشو من أول يوم. ورهاني الآن على فشل جواو موتا أكبر إذا تعاقد معه المريخ. كلّمناكم. وقلنا ليكم النصيحة لله. إذا كانت الإطاحة بالمدرب حلّاً، كان المريخ عمل ليه حاجة. سِـر الهلال في استقراره الفني. في فترة توقُّف الدوري الموريتاني يجب أن يعود الهلال لصدارة الدوري الموريتاني. رتِّبوا للموسم الجديد من الآن. طرف مازيمبي الموريتاني لاعب على أعلى طراز، هذا اللاعب أعتقد أنه مطلق السراح بعد نهاية هذا الموسم، إذا تعاقد معه الهلال سوف يحدث إضافةً كبيرةً في الهلال. الدولي إبراهيما كيتا الطرف اليمين في مازيمبي وفي المنتخب الموريتاني لاعب مع إيبولا بقفل الطرف اليمين بالطبلة والمفتاح. بعد الدوري الموريتاني والسوبر السوداني، لاعبو الهلال في حاجة إلى راحة سلبية طويلة. نحنُ ضد زيادة عدد المُحترفين في الهلال، هنالك مُحترفون يمكن الاستغناء عنهم. جونيور أصبح بعيداً وعثمان ديوف بقع في أخطاء كثيرة، والطيب بن زيتون لا مهاجم ولا مدافع. استبدال هذه العناصر بمهاجم صريح وارتكاز ومدافع، يُمكن أن يجعل الهلال في حِتّة تانية. أما بقية الأسماء، فاستمرارها ضروري مع الهلال. هنالك فرصة لتجنيس لاعب أو اثنين للاستفادة منهما في المنتخب. جوباك وكنن وكردمان وخيري وسيمبو ومدني وكبه هم نجوم ورجال الموسم القادم. هذه العناصر الشابّة يجب المحافظة عليها وعدم التفريط فيها. … ترس أخير: أنا فصاحة سادس الدوري الموريتاني في الأهلي المصري بطل القرن ما شُفتها.
