أحدث الأخبار مع #عمروقورة،
مصراوي
١٨-٠٣-٢٠٢٥
- ترفيه
- مصراوي
عمرو قورة: هذه أسباب منافسة "mbc مصر" لقنوات المتحدة.. والعوضي وعمرو سعد "مش مكسرين الدنيا"
قال عمرو قورة، الخبير الإعلامي، إن عدد المسلسلات الرمضانية يفوق قدرة أي شخص على متابعتها. وأضاف في حوار يُنشر لاحقا على مصراوي: المسلسلات كتير أوي عن قدرة الناس أنها تتابعها، العدد وصل لـ42 عملا، أنا مثلا مهتم بالموضوع وبتفرج على 6 مسلسلات، مش ممكن أكتر من كده، صعب جدا تلاقي حد بيتفرج على كله، كلهم مسلسلات حلوة، ده مجهود ناس اشتغلت.. وحلو أو وحش ده يرجع لذوق كل واحد. واعتبر قورة أن قناة mbc مصر استطاعت منافسة قنوات المتحدة بشكل عام، قائلا: الحاجة المهمة جدا، mbc مصر بتنافس كل قنوات المتحدة، بسبب أنهم قناة واحدة، أنت بتظبط قناة ومش بتقلب، عندك برنامج رامز وبعديه العتاولة وبعديه المداح، وبعديه أشغال شاقة جدا، من وقت الفطار حتى 12 صباحا، مميز جدا وغير مشتت، لكن في المتحدة عندك 4 قنوات على الأقل + قنوات الدراما.. بيني وبينك صعب أقلب ونلحق ده ونلحق ده، وكمان مفيش اهتمام بالمواعيد، بمعنى لو كاتبين شاهدوا المسلسل الساعة 8 م ممكن ميبدأش قبل 9 م، بسبب الإعلانات ومحدش هينتظر، بتروح للمنصة أو تركز على قناة واحدة وهي mbc مصر. وأوضح قورة: كلامي ليس معناه أن جودة مسلسلاتهم أحسن، لكن أسهل للمتابع، بتفرج على حاجة وعارف اللي بعده. وكشف قورة سبب منافسة mbc مصر، قائلا: تشتيت المشاهد ليس أمرا جيدا، أنا لو مكان الشركة المتحدة، اشتغل بقى إعادات في كل القنوات، وأختار قناة أو 2 بالكتير يذيعوا المسلسلات، لكن كون المسلسل هنا وبعديه مسلسل تاني في قناة تانية متلحقش بدايته ده أمر مزعج، وأعتقد دي آخر سنة هتحصل فيها الحكاية دي. وعن إمكانية خفض عدد المسلسلات في رمضان المقبل، قال الخبير الإعلامي: أنا أنادي منذ سنوات بفكرة الـ15 حلقة، وبالتالي أنا بالنسبة لي إن المسلسلات الكتير أوي كده صعب تعوض فلوسها من موسم رمضان. وأضاف قورة: الصح، ربع هذا العدد، ربع الـ42 مسلسل، يعني 10 مسلسلات، ويبقى على قنوات المتحدة 6 مسلسلات وmbc مصر هي حرة تعمل اللي هي عايزاه، إحنا بنهرج، محدش هيقدر يتابع أكتر من كده. وتابع عمرو قورة: كمان فيه حاجة مهمة، ناس تقولي مسلسل عمرو سعد أو أحمد العوضي، مكسرين الدنيا، وكل مصر بتتفرج عليهم، وأنا لا أعتقد ذلك، هم بيتوجهوا للمشاهد c وd، عايش في الأرياف، غلبان شوية ميقدرش يشترك في منصة وهم شريحة كبيرة، لكن مين بيدفع الإعلانات، بالتأكيد المعلنين الكبار. وأكمل الخبير الإعلامي: أنا مرة قولت على مسلسل مش حلو وكلموني من الوكالة اللي عاملة المسلسل، وقالوا أرجوك المعلنين هيبطلوا يشتغلوا شيل البوست، استغربت جدا، قالي أنت كل المعلنين أصحابك واللي بيأثر على المعلنين واحد زيي يكتب كلام، لكن دي شغلتي، مش شرط عندك 80% من المشاهدة لكن الـ 20% هم اللي بيصرفوا على الإعلانات، إحنا كمان غلطتنا الأساسية معندناش شركة أبحاث مظبوطة.
مصراوي
١٧-٠٣-٢٠٢٥
- ترفيه
- مصراوي
"الشاشة بايظة".. عمرو قورة: طارق نور حاول تقليل الإعلانات على التليفزيون و"مقدرش"
قال عمرو قورة، الخبير الإعلامي، إن نشر أي معلومات أو قوائم بنسب مشاهدة القنوات، هدفه جذب مزيد من الإعلانات وتوجيهها. وأضاف "قورة"، في حوار يُنشر لاحقا على مصراوي: مؤكد أن نشر نسب المشاهدة يستهدف جذب الإعلانات، المعلن بيجي يقولي أنا معايا 100 مليون جنيه أفرشهم على كل القنوات، وبعد أسبوع بيعملوا هم بحث وبيشوفوا الحاجات الرائجة من وجهة نظر الطبقة المستهدفة في الإعلان، المعلن ده هو اللي لسه مخلي التليفزيون يعيش، لو إحنا في بلد الناس بتذاكر أوي، مش هتحط إعلانات على التليفزيون خالص، بص النظام غلط. وتابع قورة: طارق نور، رئيس الشركة المتحدة، المفروض ملك الإعلانات، بس مش عارف هيعمل إيه.. مضحكش عليك موقفه صعب جدًا لأنه حاول واتكلم معايا عشان يقلل المساحة الإعلانية لأن الشاشة "بايظة" بسبب الإعلانات، مقدرش ينفذ اللي هو نفسه فيه، الـ20 سبوت اللي ببلاش أنت بتشوفهم طول النهار، وده مش مدفوع ثمنه، هم بيدفعوا ثمن الإذاعة الأولانية. وأوضح: mbc مصر نفس الشئ، بيحطوا الإعلان على رامز ومعاه 20 سبوت، المنظومة كلها بايظة، ومسلسلات الـ 15 حلقة فيها ميزة، بتخلص بسرعة بدون مط أو تطويل، وناس كتير بتقدر تشتغل، بس هو فيه تركيبة غلط في المنظومة. وتابع: يعني سعر الإعلان الـ30 ثانية عند mbc مصر وعند الشركة المتحدة بمليون ونصف مليون جنيه، ده الـ30 ثانية، لو هتحط دقيقة يبقى 3 ملايين جنيه، وفي أي إعلان المعلن بياخد 20 frame تحطهم في أي وقت بقى.
مصراوي
١٧-٠٣-٢٠٢٥
- ترفيه
- مصراوي
عمرو قورة: سوق الإعلانات في مصر 5 مليارات جنيه.. والمتحدة ستفوز بالنصيب الأكبر
كشف عمرو قورة، الخبير الإعلامي، حجم سوق الإعلانات في مصر. وقدّر "قورة"، في حوار مع مصراوي يُنشر لاحقا، أن سوق الإعلانات في مصر قد يصل إلى 5 مليارات جنيه في العام. وأوضح الخبير الإعلامي: السوق حاليًا حسب معلوماتي الخاصة، ما بين 3.5 و4.5 مليار جنيه في موسم رمضان، وفي العام كله لا يزيد على 5 مليارات جنيه. وعن الفائز بالنصيب الأكبر في حصة الإعلانات للموسم الرمضاني الحالي، قال قورة: أكيد المتحدة، لأن عندهم عدد من القنوات وعندهم أيضًا قوة.. المتحدة ممكن تاخد من الرقم اللي قولته حوالي 2 مليار جنيه والباقي mbc مصر وفيه 5% للنهار وكام قناة كده. وقال قورة، إنه لم يجذبه أي إعلان تليفزيوني على الشاشة هذا الموسم حتى الآن، موضحا: مفيش ولا إعلان علق معايا، لدرجة قبل رمضان كان فيه إعلان شهير لياسمين عبدالعزيز وحاولت أتفرج على المسلسل بتاعها أول حلقة، حاسس أنها بتعمل الإعلان، خلاص الإعلان خدمها هي، لكن هل المشاهدين بيتفرجوا؟ لأ خالص ودي حاجة غريبة، في المقابل مثلا ريهام حجاج، ذكية وعرفت فين المشكلة، غيرت الكاتب واشتغلت مع مؤلف جديد ودخلت أبطال صغيرين ومخدتش الشاشة لوحدها وده ذكاء منها. وتابع: شركات الإعلانات ليس لديها أدوات تمكنها من معرفة حجم المشاهدة، مفيش أي وسيلة، بيعملوا بحث وعينة من ألف شخص، وهذا لا يكفي، في ظني أن الشركة المتحدة قلقانة يكون البحث في غير مصلحتها.
