أحدث الأخبار مع #محمدنبيلابنخالتي

24 القاهرة

أول تعليق من أسرة الغطاس محمد نبيل المتوفى غرقا بالعين السخنة نتيجة إهمال شركة O2 Diving: كانوا بيحاولوا يسكتونا

كشفت أسرة الغطاس محمد نبيل ، المتوفى غرقًا في العين السخنة خلال تأدية مهام عمله، تفاصيل وفاته، التي كانت نتيجة إهمال شركة O2 Diving للغطس، في صيانة وتصليح معدات الغطس واستخدام أكسجين ملوث. أسرة الغطاس محمد نبيل تكشف تفاصيل وفاته غرقًا بالعين السخنة وقال سعيد جابر، ابن خالة الغطاس محمد نبيل، في تصريحات خاصة لـ القاهرة 24: محمد نبيل ابن خالتي أكبر إخواته وهو اللي مسئول عن أسرته بعد وفاة والده، وهو غطاس في شركة O2 Diving للغطس، وشغال في الشركة بشكل دوري ومعاهم من 5 شهور، ومتأمن عليه في الشركة، وطلبوا منه شغل يوم الواقعة والمفروض إنه هيرجع البيت يوم الأربعاء بالليل، وإنه مهمة عمله تحت الماء بتستغرق من نص ساعة لساعة إلا ربع، ومينفعش يطول تحت الماء أكتر من كده، وقبل ما ينزل المياه كان مكلم والدته، ومعرفها إنه راجع البيت بعد الشغل. وأضاف سعيد جابر، ابن خالة الغطاس محمد نبيل: كان متفق مع والدته في آخر مكالمة بينهم إنهم هيتغدوا مع بعض بعد ما يرجع من الشغل، وعدى ساعة واتنين والدته منتظراه لإن هي عارفه مواعيد شغله، وفي حين أنه اختفى تحت الماء لساعات طويلة إلا إن الشركة أصلًا مكنتش عارفه بغيابه لحد الساعة 7 مساءً يوم الأربعاء، وعرفنا بوفاة محمد من حد اتصل من موبايله على والدته وعرفها بوفاته هو زميله حسن غرقانين. وتابع: الشركة كانت بتحاول تسكتنا وأول ما وصلنا لـ الميناء في العين السخنة قالولنا ايه اللي جابكم دلوقتي كنتوا خليكوا للصبح، ولما سألنا الشركة قالوا إنهم نزلوا الغواصين أول غطسة يبحثوا عن محمد، وفضلوا يقولوا لنا لسه استنوا لحد ما النهار يطلع عشان الليل دخل علينا، حتى في الوفاة واستخراج الجثة كان في إهمال، واستكمل: محمد نبيل ابن خالتي والده متوفى وهو اللي كان شايل مسئولية أسرته من صغره بعد وفاة والده، وعيد ميلاده الـ 26 كان في شهر 7 المقبل، هو كبير والدته واخواته كلهم لسه في التعليم، وموبايلات حسن ومحمد عليها فويسات من زميل لهم كان معاهم في نفس الشركة ومشي وسابها من فترة، بيشكوا فيها من المعدات والصيانة بتاعت الشركة والأكسجين اللي في الأسطوانات. وأردف: كل اللي بنطلبه هو حق محمد نبيل وحسن عدلي، لأن الشركة دي تسببت في الإهمال اللي أدى لوفاتهم، ودي واقعة متكررة لنفس الشركة، وفي عام 2016 حصل نفس الواقعة، واتكررت في عام 2019، ولكن المرادي تكررت مع حسن عدلي ومحمد نبيل، شابين عمرهم صغير مكملوش الـ 30 سنة. بسبب عدم صيانة أسطوانات الأكسجين.. غرق غطاسين في العين السخنة نتيجة إهمال شركة O2 Diving الغطس غياب تحديث المعدات وإجراء الصيانة.. صديق أحد الغطاسين الغارقين بالعين السخنة نتيجة إهمال شركة O2 Diving يكشف سبب الكارثة | خاص