أحدث الأخبار مع #والليمالوشخير

24 القاهرة

أبرز تصريحات هند صبري: عمري ما كنت الأعلى أجر ومبشتغلش عشان الفلوس

حلت الفنانة هند صبري ، ضيفة على أحد البرامج التليفزيونية، وتحدثت خلال اللقاء، عن تفاصيل حياتها الشخصية ومشوارها الفني، كما كشفت عن أنها لم تتقاضى أعلى أجر في الساحة الفنية. أبرز تصريحات هند صبري - ناقصني راحة البال، وكل ما أوصل لحاجة معينة يجيلي منغصات، وبعمل كل اللي في وسعي علشان أوصل للرضا، ومهنة الفن مش سهل فيها تكون راضي، لأنك تحت حكم الناس اللي بيكون قاسي. - الفنان يوم فوق ويوم تحت، وبعدين بيبدأ يدور على الانتباه وبيحصل سباق لا نهاية له وهو سباق خسران من البداية. - زمان كنت بقرأ كل التعليقات وأعيط وزوجي اللي ساعدني وفهمني أن انتقادات السوشيال ميديا شيء نسبي ولا تمثلني ولا هي مطلقة، ودلوقتي شُفيت ومبقتش أقرأ تعليقات ولو قرأت مبتضايقش، أنا شغلتي أني أمثل مش أني أرضي كل الناس ولا أستمد قوتي من ناس على السوشيال ميديا معرفهاش. - طفولتي كانت عادية ووحيدة وده اللي خلى خيالي ينمو وعمري ما كنت شقية وكنت حساسة وهشة ومسالمة. - وأنا صغيرة قولت لأهلي لو جابوا ليا أخ أو أخت هروح أعيش عند جدتي، كنت حابة آخد كل حبهم ليا أنا مش عايزة اتقاسمه، مكنتش فاهمة أنه بيتضاعف غير لما خلفت اتنين، ودلوقتي ندمت وبقول يا ريت كان عندي إخوات. - بحس أن ضعف أحكي همومي، لأني كنت ضعيفة وأنا صغيرة والناس بتاخد طيبتك ضعف وتدوس، وقويت نفسي لأقصى درجة ودلوقتي بحاول أرجع وأعمل اتزان. - أنا عارفة مين الأعلى أجرًا، طبعًا الفلوس مهمة وعمري ما كنت الأعلى أجرًا لأن معروف عني أني مبشتغلش علشان الفلوس، وبتكسف أتكلم في فلوس والحمد لله أن عندي مدير أعمال بتكلم في الأجر ولكني عمري ما كنت الأعلى أجرًا. - الأجر والموهبة مالهمش علاقة ببعض، في ناس أجرها عالي لكن مش الأعلى موهبة، والعكس صحيح. - أنا وزميلات كبار مبنعرفش نعرض أجر عالي لينا في السوق، وهتتخض لو عرفت من الأعلى أجرًا. - عمري ما اشتغلت علشان الفلوس لأني مش محتاجة، مبسوطة أني بكسب كويس من شغلي ولكني ساعات ببقى ناسية أخدت الدفعة المستحقة ولا لاء. - مينفعش مهنة زي التمثيل والسينما تمشي بـ تريند السوشيال ميديا، السينما يعني الخلود وذاكرة الشعوب والأوطان. - أنا متجوزة مصري وبناتي مصريات تونسيات وأنا معايا الجنسية المصرية، واللي مالوش خير في بلده مالوش خير في حد وعمري ما تنصلت من تونسيتي، وفي نفس الوقت بكن كل الحب والامتنان لمصر، وجزء كبير مني بقى مصري ومش عارفة من غير حب المصريين كنت هبقى فين. - فيه أصوات بتعلى ساعات وبيقولوا إنتي مش تبعنا ومش من هنا، زي ما في أصوات عنصرية في أمريكا، ودول لا يمثلوا الأكثرية وعمري ما هديهم الفرصة دي. - مبحبش أبني علاقاتي على الشهرة ومفيش حواليا مرتزقة الشهرة. - زوجي مبيغيرش من نجوميتي وعنده ثقة في نفسه مستفزة إلى حد ما، ولو بيدعي عدم غيرته مكنش هيستحمل يبقى مع ممثلة 17 سنة. - أول ما بدأت كنت عايزة أعتزل لأني اتخضيت من حجم المخاطر ووقتها كنت لسه صاعدة. - الفنانين بيكتأبوا أكتر من الناس التانية، وربنا مش خالقنا علشان نبقى مبسوطين طول الوقت. هند صبري تلقي كلمة مؤثرة خلال تكريمها بجائزة الإنجاز الفني في مهرجان بيروت الدولي لسينما المرأة تعرف على الاسم المبدئي لـ مسلسل هند صبري الجديد إخراج مريم أحمدي