«كل واحد حر في بيته».. محمد سامي يرد على منتقدي أعماله (فيديو)

الاقباط اليوم

منذ 2 أيام

علق المخرج محمد سامي على الانتقادات التي تتعرض لها أعماله بأنها تصور المجتمع بطريقة سلبية مؤكدًا أنه يحترم قرارات الرقابة، وأن كل شخص لديه الحرية فيما يشاهده.
وقال خلال مشاركته في ندوة ضمن فعاليات قمة الإعلام العربي: ممكن اللي يخدش حياءك مايخدشش حياء غيرك، وممكن العادي بالنسبة لك ميكونش عادي عند غيرك.. فيه ناس بتشوف أن التلفزيون حرام.. ممكن واحد يبقى شايف مشهد مسك الأيد زيادة وواحد تاني بالنسبة له البوسة أو الحضن هو اللي زيادة.
وأضاف: إحنا كصناع بنحترم الرقابة لأني مش هروح لبيت 100 مليون عربي اسأله حضرتك ومراتك والأولاد بتحبوا إيه أنا بتبع قواعد الرقابة مش رقابة بيتك رقابة الدولة والمحطة.. أنت حر في بيتك وبما إنك حر في بيتك لو الدور الرقابي مش عاجبك في حاجة كويسة ريموت ممكن تختار منه رقابة لبيتك.
كان المخرج محمد سامي، قد أعلن اعتزاله الإخراج التليفزيوني، وذلك بعدما قدم هذا العام مسلسلي سيد الناس بطولة النجم عمرو سعد، وإش إش بطولة الفنانة مي عمر.
ونشر سامي منشورًا على صفحته الرسمية على فيسبوك، صباح الخميس، عنونه بـوداعا الدراما التلفزيونية، موضحًا أن سيد الناس وإش إش، هما آخر أعماله الدرامية في التليفزيون.
وقال في نص منشوره: السنة دي كانت آخر أعمالي التلفزيونية، واللي فيها بودع المسلسلات، رحلة طويلة حولي 15 سنة، قدمت فيهم كل اللي قدرت عليه لإسعاد الجمهور العربي، وحققت بفضل ربنا نجاحات مع نجوم كتير ومع شركات وقنوات كلها مهمة، وكان دايما الجمهور بيشجعني، سواء بردود الأفعال أو بتصويته ليا في الجوائز.
وتابع سامي قوله: أي نجاح حققته كان بفضل ربنا والجمهور، يمكن المقربين ليا عارفين إني واخد القرار ده من فترة وهو اعتزال الإخراج التلفزيوني، ولكن كنت بنتهي من التزامات موقعة مع شركات ونجوم والحمد لله انتهيت منها وكان آخرها 2025.
وواصل: معنديش حاجة أكتر أقدر أقدمها في التلفزيون، وخايف من تشبع الجمهور من أسلوبي، ومن الوقوع في فخ التكرار ودائرة المتوقع والملل، والوحيد القادر على الدوام هو الله وحده.
واستكمل: الحمد لله، آخر عملين ليا إش إش وسيد الناس حققوا نجاح أنا سعيد بيه، كل يوم بلدي العظيمة مصر بتطلع صناع جداد موهوبين ومثقفين ويقدروا يقدموا أفضل من اللي قبلهم، وهنفضل طول الوقت بنقدم أعمال مصرية يلتف حولها الجمهور العربي.
وأضاف: بشكر كل حد ساعدني في الرحلة وبشكر كل زميل منافسته كانت دافع للتميز، بعتذر عن أي مشهد قدمته أثناء الرحلة ولم يلقَ استحسان الجمهور أو إعجابهم، في الآخر الفنان دايما بيجرب والفنون جنون زي ما بيقولوا.