يَا (غَرِيب) يَلّا لي بَلَدَك

يَا (غَرِيب) يَلّا لي بَلَدَك
سانت جورج الإثيوبي 9، الوحدات الأردني 7، اتحاد اب اليمني 6، تفرغ زينة الموريتاني 4 رقم جديد يُضاف في سجلات المريخ.
غرائب هذه الهزائم أنها كانت أمام فرق ليس من الفرق الأفريقية أو العربية المعروفة في المنطقة، الموسومة بالتاريخ الكبير، أو المُصنّفة في أفريقيا أو آسيا، مثل الأهلي المصري والترجي التونسي والهلال السعودي والاتحاد، وكلها كانت في ظروف غامضة وكلها أمام المريخ. وكلها انطبقت على المريخ فيها (خرج ولم يعد).
أربعة في الدوري الموريتاني بتعادل 13 في الدوري الإنجليزي براكم قلتوا دوري ضعيف.
عندنا قريبنا زول صعب شديد، النوع الما بنزل بي (تِريس)، ولا بتم النزول بي جوكر، ولا برمي قريب غطا، ولو باللفة، زول صعب جد، اسمو (حسن خيط الجماعة)، اسمه كدا، ما تقيفوا كتير في الاسم، (ما بحب زول يراجعني في الأسماء)، الزول دا كان وقت يكون عاوز يكرم ليه زول بمشي معاه السوق الكبير، وبقيف جوار مطعم السمك، وبقول ليه: أسمع أنا السمك ما عندي ليه قروش، لكن شوف ليك أي واحد طالع من المطعم دا وشاكلو وسمِّعو مية كلمة فارغة، وما تعاين لي حجمه وأبعد ليّ منو.
يمين أشربو ليك شراب، وارميهو قدامك متل فوانيس العربية العاملة حادث، واطرِّشو ليك السمك الما عندنا ليه قروش دا، سمكة سمكة.
في ناس بتموا الشَّكلة (نضمي).
وفي ناس في الدنيا دي عندهم مشكلة مع (السمك).
الزول بعد ما يشم ريحة السمك بقول ليه: أنا رجالتك ما عندي فيها كلام يا (حسن خيط الجماعة)، بس كلامك دا كان ممكن تعملو في الحلة أو في الموقف أو الدكان أو النادي، يعني ما في داعي تجيبنى المشوار دا كله لي مطعم السمك عشان تعزمني (شكلة).
الدنيا ما طارت!!
كان ممكن تشاكل في حِلّتك، ما في داعي للسمك وقت ما ح نأكلو.. إنت عارف أنا ضعيف قدام السمك.
هسع (حسن خيط الجماعة) دا ذكّرتني ليه هزيمة المريخ في آخر مباراة للمريخ في الدوري الموريتاني 0 / 4 أمام تفرغ زينة (فضيحة السواد)، والله أنا فترت من الهزائم الكتيرة للمريخ، بقيت أخجل ليهم.. اتخيّلت ناس الهلال يعملوا نفس الشئ مع ناس المريخ ويقولوا ليهم، أعملوا ليكم شكلة في أي زقاق فيك يا موريتانيا أو نظموا ليكم أي مباراة مع أي فريق موريتاني وابعدوا لينا منها.
إن شاء الله مباراة (شرفية).
يمين نجيب ليكم حقكم تالت ومتلت.
نجيب ليكم حقكم لغاية عندكم.
الموريتانيون ديل لقوا المريخ لا حول له ولا قوة نزلوا فيه هزائم.
مفروض الشناقيط ديل يعملوا لينا نحن الهلالاب أبطال الدوري حساب، لو ما عاوزين يعملوا حساب للمريخ.
معقولة بس فريق يخسر في الدوري الموريتاني (10) مباريات ويتعادلوا (8) مباريات!!
ويقولوا ليك دوري ضعيف والمشاركة (شرفية).
المريخ من 30 مباراة حقق (44) نقطة وجاء في المركز السادس في الدوري الموريتاني.
في دوري ضعيف وما عندو قيمة.
وزينة وعاجباني.
المريخ فقد (46) نقطة، دي حاجة كتيرة شديد، الكلام دا حصل في الدوري الموريتاني؟ ما في الدوري الإنجليزي.
عشان نشرح ليهم الحتة دي، نوقعها ليهم كيف؟
نقول ليهم شنو؟
ولله نحن احترنا معاهم.
جيبوا ورقة وقلم.
شوفوا أبسِّط ليكم الحكاية شديد، أشرحها ليكم بي فهم ناس سنة رابعة ابتدائي، عشان بعدين ما يطلع لينا واحد يقعد يغالط فينا بعد كم سنة ناس المريخ يمكن ينكروا الموضوع دا ويقولوا مريخ أم درمان أصلاً ما شارك في الدوري الموريتاني، يمكن يرموها في مريخ بورتسودان أو مريخ الحصاحيصا أو مريخ بانتيو ويقولوا ديل ما نحن.
ما عارف ليه حاسس أن الليلة دي ممكن يشيلها كلها مريخ بانتيو.
مريخ بانتيو ذنبو شنو؟
بعملوها، دي حاجة أسألوني منها أنا.
عشان ما أنسى، وعشان ما تجوا يوم وتنكروا الكلام دا، بحسابات ناس سنة رابعة ابتدائي أو أساس نتيجة المريخ في الدوري الموريتاني (رسوب)!!
المريخ رسب!!
رسوب عديل كدا، نقاط المريخ في الدوري الموريتاني 44 نقطة والمجموع كله 90 نقطة، يعني المريخ نص الدرجة الكاملة ما جابها.. زمان كان الطالب وقت يجيب في الرياضيات 29 درجة، من 60 بقولوا عليه راسب في الرياضيات، مدير المدرسة بسمِّعو كلام زي السم، وأستاذ الرياضيات بسمِّعو كلام زي السم، وبعدين وقت يمشي البيت أبوه بسمِّعو كلام زي السم.. ومرات يلاقيهو زول شليق في مناسبة ما عندو معاه أي علاقة، علاقتو معاه بس عاوز يغسِّل ليه إيده، يقوم يسأله من النتيجة ويقول ليه جبت كم في الرياضيات؟ وقت يقول ليه سقطت في الرياضيات، عمك يشيل إيده من الغسيل ويسمِّع ليك الولد كلام زي السم.
في المناسبات وقت عمك يسأل الولد البغسِّل ليه ويقول ليه: إنت ولد منو؟ أو يقول ليه شبّهتك، السؤال التاني طوالي بكون: إنت جيت الكم يا ولد؟ والسؤال دا ممكن يضايق المريخاب.
أوعكم مريخابي يغسِّل ليه لي زول في مناسبة.
ابعدوا من المغاسل.
المركز السادس (الشرفي) في الدوري الموريتاني ح يلصق في المريخ، ح يبقى رتبة رسمية، أقصد شرفية.
ح يبقى (زينة وعاجباني).
المريخ رسب في الدوري الموريتاني الدوري الضعيف، الدوري الذي شارك فيه المريخ بصورة (شرفية).. المريخ (سقط) فيه!!
وزينة وعاجباني.
هو في زول بتمرمط قدر المرمطة دي في حاجة (شرفية).
أنا عارف بعد أربع سنوات بيرموها في مريخ بورتسودان أو مريخ الحصاحيصا أو مريخ بانتيو ويقولوا ديل ما نحن.
عشان كدا لازم نثبت الموضوع دا المريخ جاء في المركز السادس في الدوري الموريتاني.. الهلال طبعاً في المركز الأول، وهو بطل الدوري (الشرفي) وبفصلنا عن المريخ أربعة مراكز، و(20) نقطة قابلة بإذن الله وفضله للارتفاع في مباراة الهلال اليوم ليصبح الفارق بين الهلال والمريخ (23) نقطة. نقول إن شاء الله.
ناس مزمل أبوالقاسم بكونوا اشتهوا (الوصافة) في الحرب دي، ديل الوصافة ما لموا فيها.
يا ربي مزمل أبوالقاسم لو بكتب عن المريخ في الأيّامات دي كان كتب شنو؟
كان قال ليهم لازم نقدم شكوى، ناس تفرغ زينة ديل عندهم لاعب ود خالة أمه (دعامي) عديل كدا.
الشئ دا فيه ذكاء اصطناعي واللا طبيعي؟
الواحد ذاتو بقي يلخبط.
حميدتي دا مرة جابوه لينا (ميت حي)، ومرة جابوه لينا (حي ميت).
فعلاً جنجويد.
الشئ الما وقع لي لغاية الآن، أكرر ليكم الكلام عشان بعدين ما ينكروه، ناس المريخ ديل سخروا من الدوري الموريتاني وسخروا من فوز الهلال به، وقالوا دا دوري ضعيف وما فيه مُستوى!!
أها الدوري الضعيف دا المريخ حقّق فيه المركز السادس!!
الدوري الضعيف دا المريخ خسر فيه (10) مباريات بأربعة أجهزة فنية مختلفة، (إيطالي، سوداني، صربي رمصري) وبعد دا جاءوا في المركز السادس في موسم شارك فيه مع المريخ أكثر من (14) محترفاً أجنبياً.. بقوم يصل إلى أكثر من (40) لاعباً، شئ محلي وشئ أجنبي.
الحاجة الما قادر أبلعها، تفرغ زينة من الدقيقة 37 من عمر الشوط الأول ناقصين لاعب، بيلعبوا بعشرة من الشوط الأول وهزموا المريخ أربعة.
فضيحة السواد.
وزينة وعاجباني.
يا زينة.
قريبنا (حسن خيط الجماعة)، كنا وقت نمشي ليه زيارة ونلقاه راقد عيان، بنقول ليه يا حسن خيط الجماعة مالك بقيت ضعيف كدا؟ وحاصل عليك شنو؟ دي ما عادتك بتشعر بي شنو؟ إن شاء الله خير.
حسن خيط الجماعة بعاين في السقف وبقول لينا: شاعر زي الواقعة فيني حيطة!!
الزول دا تجيهو ملاريا، تجيهو نزلة، يشعر بي برد بي حمى بي صداع ساكت بقول ليك نفس الكلام، يجيه زول عاوز منو قروش بقول: (شاعر زي الواقعة فيني حيطة).
يوم المريخ كان مغلوب، وأنا ما عارف نتيجة المباراة، قمت الصباح أيام الجرائد، وقلت أجيب الجرائد، وأشوف الحاصل، والأيامات ديك ناس خالد عزالدين والرشيد علي عمر يشهُّوك هزيمة المريخ، في الشارع لقيت (حسن خيط الجماعة) وشو يلعن قفاه، قلت ليه يا حسن خيط الجماعة مالك، إن شاء الله خير، شكلك ما عاجبني؟
حسن خيط الجماعة، قال لي: والله شاعر زي الواقعة فيني حيطة، عرفت ليك طوالي أنه المريخ مضروب.
أصلو الزول دا ما بتقع فيه حيطة ساكت.
وزينة وعاجباني.
عندنا جارنا مريخابي وقت المريخ يكون مهزوم، وقت يلاقيك في الشارع بدون ما تسأله بقول ليك: الليلة حماس قالت ح تضرب إسرائيل، عشان ما تجيب ليه سيرة الكورة.
تفوت تخليه، تقول ليه شنو عاد بعد ما جاب ليك سيرة (حماس)؟
لكن لو جينا للجد فإنّ هزائم المريخ في الدوري الموريتاني منطقية، رئيس النادي قال نحن ما عندنا فريق ما عندنا صف أول.
والمريخ لياقتو كلها كباها في (التهاني) والمباركة لفريق نواذيبو.. عشان كدا الكورة طارت ليهم!!
بأمانة لو سوداكال كان ماسك الفريق دا كله ما كان بحصل.
البعمل فيه النمير دا، سوداكال ما بعمله، في زول بقول نحن ما عندنا صف أول؟
وقت ما عندك صف أول منتظر شنو غير الأربعات؟
لكن ما سوف تندهش له أن المريخ الذي خسر (10) مباريات في الدوري الموريتاني آخرها كانت الخسارة 0 / 4 من تفرغ زينة، وقت الهلال يتعادل في الدوري الذي تصدره الهلال وجاء فيه المريخ في المركز السادس، بتّهموا الهلال بالتواطؤ!!
المريخ يخسر عشر مباريات عادي.
يخسر بالأربعة عادي.
الهلال يتعادل (تواطؤ) طوالي، ولا بتلفتوا.
يمين الكلام دا لو سمع بيه (حسن خيط الجماعة)، يمشي على أكبر مطعم سمك فيك يا بلد، ويقول للزول المعاهو شوف أتخن تخين من الخارجين من المطعم دا واعمل معاهو شكلة وأبعد منها بعيد.
الباقي خليهو علينا ما عندك قضية.
وزينة وعاجباني.
...
متاريس
الواحد بقي بسبب هزائم المريخ بكتب في اليوم عمودين.
كتبت عمود عن التسجيلات وعن ضرورية استمرارية جان كلود وكوليبالي مع الهلال، وأجّلته بعد خسارة المريخ الكبيرة، ننشره في الغد إن شاء الله.
أوعكم من التفريط في جان كلود وكوليبالي.
معقولة تفرغوا الهلال من المدرب ومن المحترفين كمان؟
ما تعملوا لينا (تفرغ) زينة في الهلال.
كدا مشروع الهلال ببقى مشروع ترحال عديل كدا.
أي تسجيلات جديدة مقابل بيع جان كلود وكوليبالي يبقى ما عملنا حاجة.
بكرة نشوف الموضوع دا ونثبِّته بالورقة والقلم.
شعرت بي واحد مريخابي في التعليقات يقول لي وإنت مالك ومال هزيمة المريخ؟ وأرد على هذا المريخابي الذي أعطى لنفسه الحق للتعليق على العمود، ويريد أن يحرمنا نحن من التعليق على الهزيمة، إذا كان المريخاب عندهم رأي في بطولة الهلال وفوزه بالدوري الموريتاني وبقلِّلوا في قيمة فوزه، نحن ما يكون عندنا رأي في هزيمَة المريخ بالأربعة.
إذا كان المريخاب عندهم رأي في المركز الأول الذي حقّقه الهلال في جدول الدوري الموريتاني، نحن ما يكون عندنا رأي في صاحب المركز السادس.
بتتكلّموا كيف إنتوا؟
..
ترس أخير: في حيطَة وَقَعَت!!

جرب ميزات الذكاء الاصطناعي لدينا

اكتشف ما يمكن أن يفعله Daily8 AI من أجلك:

التعلم مع الذكاء الاصطناعيالتحقق من الحقائقتحويل النص إلى كلامملخص الذكاء الاصطناعي

أخبار ذات صلة

صدى الالكترونية

منذ 39 دقائق

• صدى الالكترونية

لؤي مشعبي: الله أكرمنا بالثنائية ومحظوظون بقادة مثل بنزيما وكانتي

عبّر لؤي مشعبي، رئيس نادي الاتحاد، عن سعادته الكبيرة بتتويج الفريق بلقب كأس خادم الحرمين الشريفين، بعد الفوز على القادسية بثلاثة أهداف مقابل هدف، في المباراة النهائية التي أُقيمت على ملعب 'الإنماء' بمدينة جدة، مساء الجمعة. وفي تصريحات تلفزيونية عقب اللقاء، قال مشعبي: 'الحمد لله على التتويج، حققنا الثنائية المحلية بعد موسم طويل وشاق، وثقتنا في الفريق كانت كبيرة منذ البداية، ووفقنا الله في حصد اللقب'. وأشاد مشعبي بروح القيادة داخل الفريق، مشيرًا إلى امتلاك الاتحاد مجموعة من القادة داخل الملعب، مثل دانيلو، كانتي، فابينيو وبنزيما، الذين يتميزون بالهدوء والخبرة في المواقف الحاسمة. وأضاف رئيس الاتحاد: 'منذ انطلاق المعسكر التحضيري اتفقنا مع اللاعبين على خوض كل مباراة بروح عالية من الدقيقة الأولى وحتى صافرة النهاية، وهذا ما رأيناه طوال الموسم'. وبشأن مستقبله مع النادي، ألمح مشعبي إلى احتمالية اتخاذ قرار خلال الأيام المقبلة، قائلاً: 'سنحدد موقفي قريبًا، لكن ما يمكن قوله الآن أن الموسم شهد اجتماعات كثيرة بيننا، بعضها شهد خلافات واختلاف في الآراء، لكن المميز أن كل شيء بقي داخل البيت الاتحادي ولم يخرج للإعلام'. وختم مشعبي تصريحاته بالتأكيد على أن التدخل الإداري هذا الموسم اقتصر فقط على الجوانب المالية، بينما تركت الإدارة حرية الاختيارات الفنية للجهاز الرياضي.

صدى الالكترونية

منذ ساعة واحدة

• صدى الالكترونية

ولي العهد يتوج نادي الاتحاد بلقب ⁧‫كأس خادم الحرمين الشريفين‬⁩ .. فيديو

توج صاحب السمو الملكي الأمير محمد بن سلمان بن عبدالعزيز، ولي العهد رئيس مجلس الوزراء – حفظه الله –، نادي الاتحاد بلقب كأس خادم الحرمين الشريفين للموسم الرياضي الحالي، وذلك عقب فوزه على القادسية في المباراة النهائية التي أقيمت مساء اليوم. وتسلم لاعبو الاتحاد الكأس والميداليات الذهبية من يد سمو ولي العهد، في لحظة تاريخية تؤكد دعم القيادة المستمر للقطاع الرياضي. ونيابة عن خادم الحرمين الشريفين الملك سلمان بن عبدالعزيز – حفظه الله – .. شرّف ولي العهد صاحب السمو الملكي الأمير محمد بن سلمان بن عبدالعزيز -حفظه الله- المباراة النهائية على كأس خادم الحرمين الشريفين للموسم الرياضي الحالي، بين فريقي الاتحاد والقادسية، وذلك على ملعب الإنماء بمدينة الملك عبدالله الرياضية في جدة. وجاء هذا التتويج عقب أداء قوي قدمه نادي الاتحاد في النهائي، توج خلاله مسيرته في البطولة بتحقيق اللقب الأغلى وسط فرحة عارمة من الجماهير. اقرأ أيضًا :

الرياضية

منذ 2 ساعات

• الرياضية

وداع القلم بعد ثلاثة عقود..

مع ختام الموسم الرياضي السعودي لهذا العام، أجدني أقف عند مفترق طريق مختلف، أودّع فيه القلم الذي رافقني طوال ثلاثة عقود من الكتابة في مجال الرياضة، متنقلاً بين صفحات عدة صحف، كانت فيها 'الرياضية' المنصة الأكثر حضورًا للطرح الرياضي المختلف، وصحف أخرى مثل الاقتصادية والحياة واليوم، كانت الأكثر حضورًا للطرح الاجتماعي والاقتصادي، وجميعها قد احتضنت كلماتي وشجعتني دومًا على المضي قدمًا في خدمة الرياضة السعودية بكل صدق وحب. لقد عشت مع القلم سنوات طويلة من الشغف والمتعة، تابعت فيها تطور الرياضة السعودية موسمًا بعد موسم، ورأيت بأم عيني كيف نمت وتألقت في ظل دعم قيادتنا الحكيمة، التي أولت اهتمامًا بالغًا بالرياضة والشباب، إيمانًا منها بأهمية هذا القطاع في صناعة المستقبل وتحقيق مستهدفات الوطن. واليوم، وأنا أختتم مشواري في الكتابة الرياضية، بسبب ارتباطات عملية تستوجب علىّ التركيز فيها، أود أن أبعث برسالة قلبية صادقة للرياضة السعودية والمهتمين بها والقائمين عليها، وأقول إنني قد عشت الرياضة منذ سنة 1978م مشجعًا، ثم لاعبًا منذ 1980، ثم عضو لمجلس إدارة نادي الاتفاق منذ 1999، ثم مسؤولاً عن المنتخبات السعودية لكرة القدم عام 2011، ثم أمينًا عامًا للجنة الأولمبية العربية السعودية في 2012، وعضوًا للمكتب التنفيذي في المجلس الاولمبي الآسيوي، وأستطيع أن أقول بعد كل هذا المشوار الذي تجاوز الـ 45 عامًا، أن الرياضة السعودية، ما زال لديها الكثير والكثير لتقدمه، بمجرد وجود الأشخاص المناسبين في كل مفاصلها، بل وستكون في قائمة أفضل عشر دول في العالم لو حدث ذلك. أتمنى للرياضة السعودية كل النماء والازدهار، وأن تواصل مسيرتها المباركة نحو تحقيق المزيد من الإنجازات التي تتناسب مع حجمها، محليًا وقاريًا ودوليًا. وأدعو المؤسسة الرياضية إلى وضع استراتيجية واضحة ذات محطات مرحلية محددة، تراعي التخصصية وتستعين بمديري مشاريع أكفاء؛ لضمان تحقيق الأهداف في كل مرحلة بكفاءة واقتدار. فالرياضة الحديثة لم تعد مجرد منافسة في الملعب، بل أصبحت صناعة تتطلب الاحترافية في الإدارة والتخطيط والتنفيذ، بما يليق بمكانة المملكة وطموحات شبابها. وفي الختام، لا يسعني إلا أن أتقدّم بجزيل الشكر والعرفان لصحيفة 'الرياضية' العزيزة، التي كانت ولا تزال المنصة الأجمل والأفضل لاحتضان المقالات الرياضية الفارقة، طوال السنوات الماضية، ومن خلالها استطعت أن أوثق الطرح الذي أرغب بترقيقه بكل مهنية في صحيفة رياضية متخصصة. شكرًا لكل زملائي في 'الرياضية'، من رؤساء تحرير ومحررين وفنيين، الذين تحملوا تقصيري بعض الأحيان فيما يخص توقيت تسليم المقالات، وساندوني حين احتجت، فكنتم دومًا خير سند وأهلًا للأمانة. أودّعكم جميعًا، وأودّع القلم الذي كان لي رفيق دربٍ وتحملت أمانته طوال ثلاثين عامًا، شاكرًا كل من رافقني في هذه الرحلة الماتعة. وأسأل الله أن يكتب للرياضة السعودية مستقبلًا زاهرًا، مليئًا بالتألق والإنجازات، في ظل دعم قيادتنا الرشيدة وهمة شباب هذا الوطن الغالي. وداعًا أيها القلم، وشكرًا صحيفة 'الرياضية'، ودمتم بخير.